އަމީނީ މަގު ޒަމާނި ފެންވަރަށް ތަރައްގީ ކުރުމަށް މީގެ ކުރިން ކުރި ޕްލޭގައި ވަނީ މަގުގައި ހުރި ބޮޑެތި ގަސްތައް ނުކަނޑައި އެ މަޝްރޫއު ކުރިއަށް ގެންދިޔުމަށް ކަމަށް މާލެސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ. 

މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުޢިއްޒު ވިދާޅުވީ، އަމީނީ މަގުގެ މަސައްކަތް ޕްލޭނިންގ މިނިސްޓްރީން އާރްޑީސީ އާއި އެކު އެބަސްވީ ސިޓީ ކައުންސިލާއި އެކު ހެދި އެއްބަސްވުމުގެ ދެ ގުނަ އަގުގައި ކަމަށެވެ. އެހެން ނަމަވެސް އެކަމުގައި، އާރްޑީސީ އަށް އެއްބާރުލުން ދެމުންދަނީ، މާލޭގެ ތަރައްގީއަށް ކުރާ މަސައްކަތް ތަކުގައި އެހީވާން ކަމަށް މުޢިއްޒު ވިދާޅުވިއެވެ. 

މީގެ އިތުރުން ވެސް މުޢިއްޒު ވަނީ އަމީނީ މަގު ހެދުމުގައި މަގުގެ ފުޅާމިން ހަނިވާ ގޮތަށް ހަދަމުންދާތީ ކަންބޮޑުވުންފާޅުކޮށްފައެވެ. އެގޮތުން މުއިއްޒު ވިދާޅުވީ އާރްޑީސީން މީގެ ކުރިން ހެދި މަގުތަކުގައިވެސް، މަގުގެ ފުޅާމިން ދެ ފޫޓު ނުވަތަ ދޮޅު ފޫޓު ހަނި ކޮށް ހަދާފައިވާ ކަމަށާ، އެކަން އެގޮތަށް ނުކުރުމަށް، ރޯޝަނީ މަގު ހަދާ ނިމުމުންވެސް އާރްޑީސީ އާއި އެކީ ނިންމަވާފައިވާ ކަމަށެވެ. އެހެން ނަމަވެސް އެ ނިންމެވުން، ޕްލޭނިންގ މިނިސްޓްރީއާއި އެކު ނިންމާފައި ނުވާކަން ފާހަގަކުރައްވައި މުއިއްޒު ވިދާޅުވީ، އެގޮތަށް ނިންމަވާފައި ނެތުމުން ކުރީގެ ޑިޒައިނަށް އެކަން ކުރެވެމުންދާ ކަމަށާ، އޭގެ ސަބަބުން ތިން ފޫޓު މަގުން ހަނިވެގެންދާކަމަށެވެ. 

އެހެން ކަމުން އުއްމީދަކީ ސިޓީ ކައުންސިލްގެ އެ ކަންބޮޑުވުން އަޑު އަހައި، މަގުގެ ފުޅާމިން ރަނގަޅުކޮށް، ގަސްތައް ނުކަނޑައޖ މަގު ހެދުމުގެ މަސައްކަތް ސަރުކާރުން ގެންދިޔުން ކަމަށްވެސް މުއިއްޒު ވިދާޅުވި އެވެ.