ޒަމާނީ ފެންވަރަށް އަމީނީ މަގު ތަރައްގީ ކުރުމަށް ކުރަމުންދާ މަސައްކަތްތަކުގެ ތެރެއިން އެމަގުގައި ހުރި ގަސްތައް ކަނޑަމުންދާތީ އެކަން ހުއްޓުވަން ސިވިލް ކޯޓަށް ހުށަހެޅި މައްސަލާގައި ގަސްތައް ނެގުމުގެ ވަގުތީ އަމުރެއް ނެރެވެން ނެތް ކަމަށް ކޯޓުން ނިންމައިފި އެވެ.

އެމައްސަލަ ހުށަހަޅާފައިވަނީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދެވެ. ނަޝީދު ހުށަހެޅުއްވި މައްސަލާގައި ވަނީ އަމީނީ މަގުގެ ގަސްތައް ކެނޑުމާއި އުފުރުން ހުއްޓުވުމުގެ ވަގުތީ އަމުރަކަށް އެދިފައެވެ. އެހެން ނަމަވެސް ނަޝީދު އެދިވަޑައިގެންނެވި ގޮތަށް ވަގުތީ އަމުރު ނެރެފިނަމަ މަގު ހެދުމުގެ މަޝްރޫއާ އެކު، އެ ކުންފުންޏަށް މާލީ ގެއްލުންތަކެއް ވާނެ ކަމަށް އެމަސައްކަތް ކުރަމުން އަންނަ އާރްޑީސީން ވަނީ ބުނެފައެވެ.

ރައީސް ނަޝީދުގެ ފަރާތުން ހުށަހެޅި މައްސަލައިގައިވާ ގޮތުން އަމީނީ މަގުގެ ގަސްތައް އުފުރުމަށް ނެގުމުގެ ކުރިން އެ ގަސްތައް ނުނަގައި މަގު ހެދުމުގެ މަސައްކަތް ކުރެވެން އޮތްތޯ ޔަގީން ކޮށްފައި ނުވެއެވެ. އަދި އެ ގަސްތައް ނުނަގައި މަގު ހެދުމުގެ މަސައްކަތް ކުރެވެން އޮތް އިރު، ގަސްތައް ނަގަމުން ދަނީ ގާނޫނުއަސާސީ އާއި ގާނޫނުތަކާއި ބައިނަލްއަގުވާމީ މުއާހަދާތަކާ ހިލާފަށް ކަމަށް ކަނޑައަޅައިދިނުމަށްވެސް ނަޝީދުގެ ފަރާތުން ހުށަހެޅި މައްސަލައިގައި ބުނެފައި ވެއެވެ. 

މި މައްސަލައާ ގުޅިގެން ވަގުތީ އަމުރެއް ނެރުމުގައި ފުރިހަމަވާންޖެހޭ ކަމަށް ސުޕްރީމް ކޯޓުގެ ގަޒިއްޔާތަކުން ކަނޑައަޅާފައިވާ ކަންކަމަށް ބަލާފައިވާއިރު، ސުޕްރީމް ކޯޓުން ނިންމަވާފައިވަނީ ވަގުތީ އަމުރަށް އެދޭ ފަރާތަށް ގާނޫނީ ގޮތުން ހިމާޔަތް ލިބެންޖެހޭ ގާނޫނީ މަރުކަޒެއް އޮތުމުގެ އިހުތިމާލު ފާޅުކަން ބޮޑު ގޮތެއްގައި ގާއިމުވެފައި ނުވާ ކަމަށެވެ.

އަދި ވަގުތީ އަމުރު ނެރުމަކާނުލައި އަސްލު މައުލޫއީ ދައުވާ ލަސްވެގެން ހިނގައްޖެ ނަމަ އިއާދަ ނުކުރެވޭ ފަދަ ނުރައްކަލަކާ ނުވަތަ ގެއްލުމަކާ ކުރިމަތިލާންޖެހޭކަން އެނގެން ނެތް ކަމަށްވެސް ނިންމާފައި ވެއެވެ.

އެހެން ކަމުން މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓަކްޗާ (ދިވެހި ދައުލަތް) އަދި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑްގެ މައްޗަށް ރައްދުވާ ގޮތަށް ގ. ކެނެރީގެ / މާލެ، މުހައްމަދު ނަޝީދުގެ ފަރާތުން ނެރެދިނުމަށް އެދިފައިވާ ވަގުތީ އަމުރު، ނެރެދެވޭނެ ތަނެއް ނެތް ކަމަށް ކޯޓުން ވަނީ ކަނޑައަޅަައިފައެވެ.