މާލެސިޓީ ގައި ދިރިއުޅެމުންދާ މާލޭގެ ރައްޔިތުންގެ ތެރެއިން ވަޒީފާނެތް ޒުވާނުންގެ ޚާއްޞަ ޕްރޮގްރާމެއް ކުރިއަށް ގެންދިޔުމަށް ނިންމަވާފައިވާ ކަމަށް މާލެސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މިއަދު ކުރިއަށް ދިޔަ މާލެ މާލެސިޓީ ކައުންސިލްގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ، ސިޓީ ކައުންސިލުން އިސްނަގައިގެން ހިލޭ ސާބަހަށް މާލޭގައި ދިރިއުޅޭ، ވަޒީފާނެތް ޒުވާނުންނަށް މަސައްކަތެއް ދަސްކޮށްދިނުމުގެ ޕްރޮގްރާމެއް ފަށަން، ނިމިދިޔަ ހަފްތާގެ ބުދަ ދުވަހު މާލެ ސިޓީ ކައުންސިލުން ނިންމާފައިވާ ކަމަށެވެ.
ޚާއްސަކޮށް އާރްޓް އެންޑް ކްރާފްޓް ދާއިރާއިން. ކުރެހުމާއި ކުރެހުމުގެ ފަންނު، ފަންނު ވެރިކަމުގެ މަސައްކަތް، އެކަހަލަ އާޓް އެންޑް ކްރާފްޓް ދާއިރާގެ ހުނަރު ދަސްކޮށްދޭ ތަމްރީން ޕްރޮގްރާމެއް އަޅުގަނޑުމެން ފަށަން މި ނިންމީ.
މޭޔަރ ޑރ މުހައްމަދު މުއިއްޒު
މޭޔަރ މުއިއްޒު ވިދާޅުވީ މި ޕްރޮގްރާމުގައި މާލޭގެ ކޮންމެ އަވަށަކުން 50 މީހުން، ޖުމުލަ 300 މީހުންނަށް ބައިވެރިވުމުގެ ފުރުސަތު ލިބިގެންދާނެ ކަމަށާ، މިއީ ހިލޭ ކުރިއަށްދާ ޕްރޮގްރާމެއް ކަމުން މި ޕްރޮގްރާމުގައި ބައިވެރިވާ ފަރާތްތަކުން އެއްވެސް ފީއެއް ދައްކާކަމަށް ނުޖެހޭނެކަމަށެވެ. އަދި ޕްރޮގްރާމުގައި ބައިވެރިވެ ފުރިހަމަ ކުރާ ފަރާތްތަކަށް އެމްކިޔުއޭ ގަބޫލުކުރާ ސެޓްފިކެޓެއް ލިބޭނެ ކަމަށާ، ޕްރޮގްރާމު ކުރިއަށްދާނީ ރެޖިސްޓާރޑް އިންސްޓިޓިއުޝަނަކާއި އެކުގައި ކަމަށްވެސް މުޢިއްޒު ފާހަގަކުރެއްވިއެވެ.
ވަރަށް އަވަހަށް އިއުލާން ކޮށްލާނަން ޒުވާނުން ބައިވެރިވާން. ބޭނުންވަނީ ޒުވާނުން އެމްޕަވަރކޮށްދޭން ކައުންސިލުން. ކައުންސިލްގެ ސްޓްރެޓެޖިކް ޕްލޭންގައި އޮންނާނެ އެވާހަކަ.
މޭޔަރ ޑރ މުހައްމަދު މުއިއްޒު
މި ޕްރޮގްރާމް ނިންމާ ޒުވާނުންނަށް، އެ މީހުންގެ އަމިއްލަ ކުރެހުމާއި އެހެނިހެން ކްރާފްޓް މަސައްކަތް ރިސޯޓް ތަކާއި ގެސްޓް ހައުސްތަކަށް ވިއްކުމުގެ މަގު ފަހިވެގެން ދާނެ ކަމަށާ، އެ ކަމުގެ ތެރެއަށް ވަދެ އެފަރާތްތަކަށްވެސް އާއްދަނީ ހޯދެން ފެށޭނެ ކަމަށް މުޢިއްޒު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
