ސަރުކާރުގެ މުވައްޒަފުންނަށް މުސާރަދޭން ވެސް ދައުލަތުން މިހާރު ނަގަންޖެހެނީ ލޯނު ކަމަށް ބުނެ ޕީއެންސީގެ ނައިބު ރައީސް މުހައްމަދު ސައީދު ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.

ދައުލަތުގެ ދަރަނިތައް ބޮޑުތަނުން އިތުރުވެފައިވާއިރު، ތަފާސްހިސާބުތަކުން ދައްކާގޮތުން މި އަހަރަށް ކަނޑައެޅި ދައުލަތުގެ ބަޖެޓުގައި ހިލޭ އެހީގެ ގޮތުގައި ލިބޭނެ ކަމަށް އަންދާޒާކުރި އަދަދުގެ 10 ޕަސަންޓު ވެސް އަދި ނުލިބެ އެވެ. 

ސަރުކާރުން މި އަހަރަށް ހުށަހެޅި 37 ބިލިއަން ރުފިޔާގެ ބަޖެޓުގައި އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް އަންދާޒާކޮށްފައިވަނީ 24.28 ބިލިއަން ރުފިޔާ އެވެ. އެހެން ނަމަވެސް މިދިޔަ ސެޕްޓެމްބަރު މަހުގެ 29 ވަނަ ދުވަހުގެ ނިޔަލަށް ހިލޭ އެހީގެ ގޮތުގައި ލިބިފައިވަނީ 271.6 މިލިއަން ރުފިޔާ އެވެ. މިއީ ދައުލަތަށް ހިލޭ އެހީގެ ގޮތުގައި ލިބޭނެ ކަމަށް ލަފާކުރި އަދަދުގެ އެންމެ 9.3 ޕަސަންޓެވެ.

އެކަމާއި ގުޅިގެން ކުރީގެ އިކޮނޮމިކް މިނިސްޓަރ އަހުމަދު ސައީދު މިއަދު ކުރެއްވި ޓުވީޓެއްގައި ވިދާޅުވީ، މި އަހަރުގެ މިހާތަނަށް ޖޫރިމަނާގެ ގޮތުގައި 193 މިލިއަން ރުފިޔާ ހޯދައި، 159 މިލިއަން ދަތުރުތަކަށް ހަރަދުކޮށްފައިވާ ކަމަށެވެ. އަދި ގައުމުގެ ދަރަނި 100 މިލިއަނުން މައްޗަށް އަރާފައިވާ ކަމަށް ވިދާޅުވެ ސައީދު ވަނީ ސަރުކާރަށް ފާޑުވިދާޅުވެފައެވެ.

ކޮންމެ ދުވަހެއްގެ މައްޗަށް ދައުލަތުގެ ދަރަންޏަށް 28 މިލިއަން ރުފިޔާ އިތުރުވަމުންދާކަން ފާހަގަކުރައްވަމުން ސައީދު ވިދާޅުވީ ދައުލަތުގެ ރިޒާވް ހާމަކުރަން ވެސް ސަރުކާރުން ދެކޮޅު ހަދާކަމަށާއި، މުވައްޒަފުންނަށް މުސާރަދޭންވެސް މިހާރު ނަގަނީ ލޯނު ކަމަށް ސައީދު ވިދާޅުވި އެވެ.

ކޮންމެ ހަފުތާއަކު ފިނޭންސް މިނިސްޓްރީން އާންމުކުރަމުންދާ ދައުލަތުގެ އާމްދަނީ އާއި ހަރަދުގެ ހިސާބުތަކުން ދައްކާ ގޮތުގައި، މިދިޔަ ސެޕްޓެމްބަރު މަހުގެ 29 ވަނަ ދުވަހުގެ ނިޔަލަށް ހިލޭ އެހީގެ ގޮތުގައި ދައުލަތަށް ވަނީ 271.6 މިލިއަން ރުފިޔާ ލިބިފައެވެ.