ބަދުއަޚުލާގީ އަމަލުތައް ގިނަވުމަކީ މިއަދު ރާއްޖެއަށް ކުރިމަތިވެފައިވާ އެންމެ ބޮޑު އެއް ނުރައްކާ ކަމަށާއި އެކަމުން ސަލާމަތް ވުމަށް މިހާރު އޮތް ގާނޫނު ޒަމާނާ ގުޅޭ ގޮތަށް ބަދަލު ކުރަން ޖެހޭ ކަމަށް ހޯމް މިނިސްޓަރު އިމްރާން ވިދާޅުވި ވާހަކަތަކަށް، ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރައްދު ދެއްވައިފިއެވެ.

މިފަދަ އަމަލުތައް ސޯޝަލް މީޑިއާގެ ޒަރީއާއިން ފެތުރުން ހުއްޓުވުމަށް ގާނޫނީ އޮނިގަނޑެއް ވުޖޫދު ކުރަން ޖެހޭ ކަމަށް އިމްރާން މީގެ ކުރިން ވިދާޅުވެފައިވާއިރު، މިހާރު އޮތް ގާނޫނަކީ 70ގެ އަހަރުތަކުގެ ގާނޫނެއް ކަމަށް ވަނީ ވިދާޅުވެފައެވެ.

އެހެންކަމުން އެ ގާނޫނނު މި ޒަމާނުގެ ހާލަތަށް ގުޅުވާ ސާފުކުރަން ޖެހޭ ގިނަ ބައިތަކެއް އެބަހުރި ކަމަށް އިމްރާން ވިދާޅުވި އެވެ. އިމްރާންގެ މި ވާހަކަތަކަށް ރައްދު ދެއްވަމުން ޑރ.ޝަހީމް ވިދާޅުވީ، ރާއްޖޭގައި އެފަދަ ކަންކަމަށް ހެދިފައި ހުރި ގާނޫނުތަކަކީ، ބާ ގާނޫނު ތަކެއް ނޫން ކަމަށާއި، ގާނޫނުލްއުގޫބާތަކީވެސް ވަރަށް ފަހުގެ އެއްޗެއް ކަމަށެވެ.

ޑރ. ޝަހީމް ވިދާޅުވީ، ރާއްޖޭގެ އިޖްތިމާއީ ފޭރާން ވީދިގެން ދަނީ ގާނޫނު ނެތިގެން ނޫން ކަމަށާއި، ގާނޫނު ތަންފީޒު ނުވުމާއި، ތަންފީޒު ކުރުމުގައި ތަފާތުކުރުން ބޮޑުވުމުން ކަމަށެވެ.