ރާއްޖޭގައި ސިއްހީ ދާއިރާއާ ގުޅޭގޮތުން ހަދާފައިވާ ދިރާސާތައް ހިމެނޭ ފޮތެއް މިއަދު ނެރެފި އެވެ.
"ކޮމްޕޮންޑިއަމް އޮފް ހެލްތު ރިސާޗް އިން މޯލްޑިވްސް" ގެ ނަމުގައި ނެރުނު ފޮތުގައި 2018-2021 ވަނަ އަހަރާ ދެމެދުގެ ރިސާޗްތައް އާއްމުކޮށްފައިވެ އެވެ.
އެ ފޮތް ނެރެދެއްވީ، ހެލްތު މިނިސްޓްރީގައި މިއަދު ބޭއްވި ޚާއްސަ ރަސްމިއްޔާތުގައި ހެލްތު މިނިސްޓަރު އަހުމަދު ނަސީމެވެ.
އެ ރަސްމިއްޔާތުގައި ވާހަކަދައްކަމުން ނަސީމް ވިދާޅުވީ ސިއްހީ ދާއިރާއާ ގުޅޭ ދިރާސާކުރުން އެ ދާއިރާ އިތުރަށް ހަރުދަނާކުރުމަށް ވަރަށް މުހިއްމު ކަމަށެވެ. އެގޮތުން އެފަސަ ދިރާސާއެއްގެ އަލީގައި ބަލިމަޑުކަމުން ރައްކާތެރިވުމަށާއި ބަލިތަކުން ފަރުވާ ހޯދޭނެ ގޮތްތައް ދެނެގަނެ، ދުޅަހެޔޮ ސިއްހަތެއްގައި ހުރުމަށް ދިރިއުޅުން ބައްޓަން ކުރާނެ ގޮތްތައް އެނގިގެންދާ ކަމަށްވެސް ނަސީމް ވިދާޅުވިއެވެ.
މި ފޮތުގެ މައިގަނޑު މަގުސަދަކީ ފާއިތުވި ހަތަރު އަހަރުގެ ތެރޭގައި ރާއްޖޭގައި ކުރެވިފައިވާ ސިއްހީ ދިރާސާތަކުގެ މައުލޫމާތު ފަސޭހަކަމާއެކު އެއް ފޮތަކުން އާންމުންނަށް ފޯރުކޮށްދިނުން ކަމަށް ހެލްތު މިނިސްޓްރީން ބުނެއެވެ. އަދި ކުރިއަށް އޮތްތަނުގައިވެސް ރާއްޖެއަށް ބޭނުންތެރި، ފެންވަރު ރަގަޅު ދިރާސާތަކެއް ހެދުމަށް މަގުފަހިވެގެންދާނެ ކަމަށް ހެލްތު މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
