ނައިޖީރިއާގެ ދެކުނުއިރުމަތީ ސްޓޭޓެއް ކަމަށްވާ އަނަމްބްރާގައި ބޯޓް އެކްސިޑެންޓެއް ހިނގައި 76 މީހުން މަރުވެއްޖެއެވެ.

މި ހާދިސާ ހިނގާފައިވަނީ 80 މީހުންނާ އެކު އެ ސްޓޭޓުގެ އޮގްބަރޫ ސަރަހައްދުން ދަތުރު ކުރަމުން ދަނިކޮށް މިދިޔަ ހުކުރު ދުވަހު އެވެ. 

ނައިޖީރިއާގެ ރައީސް މުހަންމަދު ބުހާރީ ޓްވިޓަރ މެދުވެރިކޮށް އާންމު ކުރެއްވި ބަޔާނެއްގައި ވިދާޅުވީ، މަރުވި މީހުންގެ އަދަދު އިތުރުކަން އިމަޖެންސީ އިދާރާތަކުން ކަށަވަރުކޮށްދީފައިވާ ކަމަށެވެ. އެގޮތުން މި ހާދިސާގައި ގިނަ އަދަދެއްގެ އަންހެނުންނާައި ކުޑަކުދިން ވަނީ މަރުވެފައެވެ.

ބުހާރީ ވިދާޅުވީ، ބޯޓު ބަންޑުން ޖަހާލި ހާދިސާގައި ގެއްލިފައިވާ ފަސިންޖަރުން ސަލާމަތް ކުރުމުފެ މަސައްކަތް ކަމާބެހޭ ފަރާތްތަކުން ހުއްޓުމެއްނެތި ކުރަމުންދާ ކަމަށެވެ. އަދި ކުރިއަށް އޮތް ތަނުގައި ދިމާވެދާނެ އެކްސިޑެންޓްތައް ހުއްޓުވުމަށްޓަކައި ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކަށް އަންގަވާފައިވާ ކަމަށެވެ.

މިއަހަރުގެ މިހާތަނަށް ނައިޖީރިއާގެ އެކި ސްޓޭޓްތަކުގައި ބޯކޮށް ވާރޭވެހި ފެންބޮޑުވުމުގެ ހާދިސާތައް ކުރިމަތިވިއެވެ. އަދި ފެންބޮޑުވުމުގެ ހާދިސާތަކުގެ ސަބަބުން އެގައުމުގެ އެކި ސްޓޭޓްތަކުގައި ދިރިއުޅޭ މީހުންނަށް ވަނީ އެކަމުގެ އަސަރުކޮށްފައެވެ.