ދިވެހިރާއްޖެއަށް ބޭނުންވާ ތެޔޮ އަގުހެޔޮކޮށް ހޯދުމަށް ބަހުރެއިންއާއެކު މަޝްވަރާ ކުރެވިފައިވާކަމަށް ފިނޭންސް މިނިސްޓަރު އަހުމަދު އަމީރު ވިދާޅުވެއްޖެއެވެ. 

އެކަން މިނިސްޓަރު ހާމަކުރައްވާފައިވަނީ މިއަދު ރައީސް އޮފީހުގައި ބޭއްވި ޕްރެސް ކޮންފަރެންސްއެއްގައި ނޫސްވެރިއަކު ކުރި ސުވާލަށް ޖަވަބުދެއްވަމުންނެވެ. 

ދާދިފަހުން ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހު ބަހުރެއިންއަށް ރަސްމީ ދަތުރުފުޅެއް ކުރައްވާފައިވާއިރު، އެ ދަތުރުފުޅުގައި ބަހުރެއިން މެދުވެރިކޮށް ރާއްޖެއަށް ބޭނުންވާ ތެޔޮ އަގުހެޔޮކޮށް ހޯދުމަށް އެއްވެސް މަޝްވަރާއެއް ކުރައްވާފައިވޭތޯ ނޫސްވެރިއަކު ވަނީ މިނިސްޓަރާއި ސުވާލުކުރައްވާފައެވެ. އަދި އެފަދަ މަޝްވަރާއެއް ކުރައްވާފައިވާނަމަ، ބަހުރެއިންއިން އަގުހެޔޮކޮށް ތެޔޮ ލިބޭނެކަމުގެ އެއްވެސް އެއްބަސްވުމަކަށް އާދެވިފައިވޭތޯ ސާފުކޮށްދެއްވުމަށްވެސް ނޫސްވެރިއާ އެދުނެވެ. 

Advertisement

އެ ސުވާލަށް ޖަވާބުދެއްވަމުން، މިނިސްޓަރު ވިދާޅުވީ ރައީސް ސޯލިހުގެ ދަތުރުފުޅުގަޔާއި އޭގެ ކުރިންވެސް ސަރުކާރުން ބަހުރެއިން މެދުވެރިކޮށް ރާއްޖެއަށް އަގުހެޔޮކޮށް ތެޔޮ ހޯދުމުގެ މަޝްވަރާތައް ކުރެވިފައިވާކަމަށެވެ. އަދި އެ މަޝްވަރާތަކަށްފަހު ތެލުގެ މައްސަލައާއި ގުޅިގެން އަމަލުކުރާނެ ގޮތެއް އަދި ނިންމިފައި ނުވިނަމަވެސް، ރައްޔިތުންނަށް ފައިދާކުރުވަނިވި ހައްލަކާއި ހަމަޔަށް އާދެވިދާނެކަމަށް އުންމީދުކުރައްވާކަމަށް މިނިސްޓަރު ވިދާޅިވިއެވެ. 

އޭގެ އިތުރުން ބަހުރެއިންއާއެކު ކުރެވުނު މަޝްވަރާ ތަކުގެ ތެރޭގައި ރާއްޖެއަށް އިންވެސްޓުކުރާނެ އޭރިއާތަކާއި ގުޅިގެން މަޝްވަރާ ކުރެވުނުކަމަށް މިނިސްޓަރު ވިދާޅުވިއެވެ. އަދި ރާއްޖެއަށް އިންވެސްޓުކުރުމަށް ބަހުރެއިންގެ ވިޔަފާރިވެރިންގެ ޝައުގުވެރިކަން ހުރިކަން ފާޅުކުރައްވާފައިވާކަން ވެސް މިނިސްޓަރު ފާހަގަކުރެއްވިއެވެ. 

ރަޝިޔާ-ޔޫކުރެއިން ހަނގުރާމަ ދިގުލައިގެން ދިއުމާއި ގުޅިގެން ދުނިޔޭގެ ތެލުގެ ބާޒާރުގައި އަގުތައް ވަނީ އިންތިހާއަށް އުފުލިގެން ގޮސްފައެވެ.

އެކަމުގެ އަސަރުތައް ދިވެހިރާއްޖެއަށްވެސް ކޮށްފައިވާއިރު، އެކަންކަން ހައްލުކުރުމަށް މަސައްކަތް ކުރަމުން ދާކަން ފިނޭންސް މިނިސްޓަރު ވަނީ ވިދާޅުވެފައެވެ.