ވިއްސާރަވުމުގެ ސަބަބުން ލ. ގަމު ސްޓޭޑިއަމްގައި ހެދިފައިވާ ފެންގަނޑު ހިންދުމުގެ މަސައްކަތް ގައުމީ ދިފާއީ ބާރުން ފަށައިފިއެވެ.
ގައުމީ ދިފާއީ ބާރުން ބުނި ގޮތުގައި ލ.އަތޮޅު އިންޓަރ ސްކޫލު ފުޓްބޯޅަ މުބާރާތުގެ މެޗުތައް ކުޅެމުންދާ ލ.ގަން ޒޯން ސްޓޭޑިއަމްގައި، ވިއްސާރަވުމުގެ ސަބަބުން ހެދިފައިވާ ފެންގަނޑު ހިއްކުމުގެ މަސައްކަތުގައި ކައްދޫ ފަޔަރ ސްޓޭޝަންގެ ސިފައިން ދަނީ ހަރަކާތްތެރިވަމުންނެވެ.
އެ އިދާރާއިން ވަނީ އެ މަސައްކަތް ކުރިއަށްދާ ގޮތުގެ ބައެއް ފޮޓޯތައްވެސް ހިއްސާކޮށްފައެވެ.
ދިފާއީ ބާރުން ހިއްސާކުރި ފޮޓޯތަކުން ފެންނަގޮތުގައި، އެ ދަނޑުގެ ބޮޑުބައެއް އޮތީ ވަރަށް ބޮޑަށް ފެންބޮޑުވެފައެވެ.
ލ.ގަމު ޒޯން ސްޓޭޑިއަމްއަކީ 2.59 މިލިއަން ރުފިޔާ ޚަރަދުކޮށްގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ހަވާލުކޮށްގެން ހަދާފައިވާ ދަނޑެކެވެ.
އެ ސްޓޭޑިއަމް ރަސްމީކޮށް ހުޅުވާފައިވަނީ 2020 ވަނަ އަހަރުގައެވެ.
އެ ސްޓޭޑިއަމް ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުރުން ޔޫތު މިނިސްޓަރު އަހުމަދު މަހުލޫފުވެސް ބައިވެރިވެވަޑައިގެންފައިވެއެވެ.
ރާއްޖޭގެ އެކި ސަރަހައްދުތަކަށް ކުރަމުން މިދާ ވިއްސާރައިގައި، ލ. އަތޮޅުގެ ޒޯން ސްޓޭޑިއަމްގައި ވަނީ ވަރަށް ބޮޑަށް ފެންބޮޑުވެފައެވެ. ވިއްސާރާއިގެ ސަބަބުން ދަނޑަށް ކޮންމެވެސް ވަރަކަށް ގެއްލުންތަކެއް ލިބިފައިވީނަމަވެސް، މިހާތަނަށް އެ ދަނޑަށް ލިބުނު ގެއްލުމުގެ ތަފްސީލު ރަސްމީކޮށް ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
