ދިވެހިރާއްޖޭގެ ގާނޫނު އަސާސީގައި މަނާ ނޫން ކޮންމެ ކަމެއް ކުރުމުގެ ހައްގު ކޮންމެ ދިވެހި ރައްޔިތަކަށް ލިބިގެންވާ ކަމަށް ބުނެ ހަރާމް ކަންކަމަށް އަރައިގަންނަ މީހުންނަށް ރާއްޖޭގެ ފުންނާބު އުސް ދީނީ އިލްމުވެރިއެއް ކަމަށްވާ އައްޝައިޚް އަޙްމަދު ސަމީރު ރައްދު ދެއްވައިފިއެވެ. 

ގާނޫނު އަސާސީގައި "މަނާ ކުރެވިފައި ނުވާ ކަންކަން ކުރުމުގެ މިނިވަންކަން" އޮންނަ ޙާލަތްތައް ގާނޫނު އަސާސީން އަންގައިދޭ ލިޔުމަކާއި އެކު ޝެއިޚް ސަމީރު ކުރެއްވި ޓުވީޓެއްގައި ވިދާޅުވީ، އިސްލާމީ ޝަރީޢަތުގައި މަނާ އެއްވެސް ކަމެއް ކުރުން ޤާނޫނުއަސާސީންވެސް ހުއްދަ ނުދޭ ކަމަށެވެ.

އެހެން ކަމަށް ވީއިރު, މަނާކޮށްފައި ނުވާ ކޮންމެ ކަމެއް ކުރެވޭނެ ކަމަށް ބުނެ އިސްލާމީ ޝަރީޢަތުގައި މަނާކުރައްވާފައިވާ ކަންކަން ކުރާ މީހުން އެވަނީ މާތް ރަސްކަލާނގެ އަމުރުފުޅާ ޚިލާފުވުމުގެ އިތުރުން ޤާނޫނު އަސާސީއާ ވެސް ޚިލާފު ވެފައި ކަމަށް ޝެއިޚް ސަމީރު ވިދާޅުވިއެވެ. 

Advertisement

ދިވެހި ރާއްޖޭގެ ގާނޫނު އަސާސީގައި ވާގޮތުން ގަނޫނުގައި މަނާ ނޫން ކަމެއް ކުރެވޭނީ އެކަމަކީ އިސްލާމީ ޝަރީޢަތުގައި ވެސް މަނާ ނޫންނަމައެވެ.  

ޝެއިޚް ސަމީރު މިފަދަ ޓުވީޓެއް ކުރައްވާފައި މިވަނީ، "މޮޑެލް" ކުރުމުގެ ނަމުގައި އަންހެން ހެދުން ތަކެއް އަޅައިގެން ފިރިހެނުންތަކެއް މަގުމަތީގަޔާއި މީސްމީޑިއާގައި ހަރަކާތްތެރި ވުމާއި ގުޅިގެން އެކަމާ، އާއްމުން ކަންބޮޑުވުންފާޅުކުރަމުން ދަނިކޮށް، ޕްރޮސެކިއުޓާ ޖެނެރަލްގެ އޮފީހުގެ ތަރުޖަމާނު، ޕަބްލިކް ޕްރޮސެކިއުޓަރ އަހުމަދު ޝަފީއު އެކަންކަން ދިފާއުކޮށް، ގާނޫނުގައި މަނާ ނޫން ކޮންމެ ކަމެއް ކުރެވޭނެ ކަމަށް ވިދާޅުވެފައިވާ ދަނޑިވަޅެއްގައެވެ. 

މިފަހަކަށް އައިސް ދިވެހި މުޖުތަމައުގައި އެއްޖިންސުން ގުޅުން ހިންގުމާއި، ފާހިޝް ޢަމަލުތައް އާއްމު ވަމުންދާއިރު، އެފަދަ ކަންކަން ކުރާ މީހުންނަށް އިސްލާމް ދީނުގައި ކަނޑައަޅުއްވާފައިވާ އަދަބު ނުދީ، ދޫކޮށްލެވިފައިވާ މައްސަލަތަކާއި ގުޅިގެން ދީނަށް ލޯބިކުރާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.