ވިއްސާރައާއެކު ވައި ގަދަވެ އުދަ އަރާފާނެކަމަށް ލަފާކޮށް މެޓުން މުޅި ރާއްޖެއަށް ހުދު ސަމާލު ނެރެފިއެވެ.
މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން މި ސަމާލު ނެރެފައިވަނީ މިއަދު ހެނދުނު 11:30 އިން ހަވީރު 5:30 އާއި ދެމެދުގެ ވަގުތަށެވެ.
މެޓް އޮފީހުން ބުނީ ހުދު ސަމާލު ނެރެފައިވާ ވަގުތުތަކުގައި ބޯކޮށް ވާރޭވެހުމާއެކު ގުގުރައި، ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވުން އަދި ކަނޑުތައް ގަދަވެ އުދަ އަރާނެކަމަށް ލަފާކުރެވޭކަމަށެވެ.
މެޓުން މުޅި ރާއްޖެއަށް ހުދު ސަމާލު ނެރެފައިވާއިރު ހުޅަނގު މޫސުމުގެ ބާރުގަދަވެ ކުރިއަށް އޮތް ދެ ދުވަސް ހިމެނޭހެން މޫސުން ގޯސްވާނެކަމުގައި ބުދަ ދުވަހު ބުނެފައިވެއެވެ.
ބޯކޮށް ވާރޭވެހުމާއި ގުޅިގެން ބައެއް ރަށްރަށުގައި ވަނީ ވަރަށް ބޮޑަށް ފެންބޮޑުވެފައެވެ. އެ ރަށްރަށުގައި ބޮޑުވި ފެންގަނޑު ހިންދަން އާންމުންނާއި ސިފައިން ވަނީ ހަރަކާތްތެރިވެފައެވެ.
ބައެއް ރަށްރަށުގައި ވަރަށް ބޮޑަށް ފެންބޮޑުވެ އާންމު ދިރިއުޅުމަށް ބުރޫއަރާފައިވެއެވެ. ބައެއް ގޭގޭގައި ހިފާ ގެންގުޅޭ ތަކެއްޗަށްވެސް ވަނީ ގެއްލުން ވެފައެވެ
Advertisement
This content is created and paid for by advertisers and does not involve Voice Journalists
