އެކައުންޓެންޓުންނަށް ޚާއްސަކޮށްގެން ރާއްޖޭގައި ބާއްވާ އެންމެ ބޮޑު މަހާސިންތާ "މޯލްޑިވްސް އެކައުންޓެންޓްސް ފޯރަމް"ގައި ބައިވެރިވުމުގެ ފުރުޞަތު ހުޅުވާލައިފިއެވެ.

މި ފޯރަމަކީ އެކައުންޓިންގ ދާއިރާގައި މަސައްކަތް ކުރާ ފަރާތްތައް ތަމްރީންކޮށް އެކައުންޓިންގ ޕްރޮފެޝަން ކުރިއެރުވުމުގެ މަޤްސަދުގައި ބާއްވަމުން އަންނަ ފޯރަމެކެވެ.

މި ފޯރަމަކީ 2017 ވަނަ އަހަރުން ފެށިގެން އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދި މޯލްޑިވްސް (ސީ.އޭ މޯލްޑިވްސް) ގެ ފަރާތުން އިންތިޒާމްކޮށްގެން ރާއްޖޭގައި ކޮންމެ އަހަރަކު ބާއްވާ ފޯރަމެކެވެ. މި އަހަރުގެ ފޯރަމް ބޭއްވުމަށް ހަމަޖެހިފައިވަނީ "އިކޮނޮމިކް ޓްރާންސްފޮމޭޝަން، ރީތިންކިންގ ގްރޯތު އިން ދި ނިއު އިކޮނޮމީ" ގެ ތީމްއަށް ޚާއްޞަކޮށްގެންނެވެ.

މި މަހުގެ 29 އިން 30 އަށް ބާއްވާ މި ފޯރަމުގައި ފަތުރުވެރިކަމާއި، ދަތުރުފަތުރުގެ ދާއިރާ، ސަސްޓެއިނަބަލް ފައިނޭންސިންގ އަދި މަސްވެރިކަމުގެ ދާއިރާގެ އިތުރުން ތަފާތު ގިނަ އިންޑަސްޓަރީތަކުގައި ހުރި އެކި ގޮންޖެހުންތަކަށް އަލިއަޅުވާލެވިގެންދާނެކަމަށް ސީއޭ މޯލްޑިވްސްއިން ވިދާޅުވެއެވެ.

އެގޮތުން މި ފޯރަމްގައި ބައިވެރިވުމަށް ސަރުކާރުގެ މިނިސްޓްރީތަކާއި، ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަކުގެ އެކައުންޓިންގ އަދި އޮޑިޓިންގ ޑިޕާޓްމަންޓްތަކުގައި މަސައްކަތްކުރާ ފަރާތްތަކަށް ފުރުޞަތު ވަނީ ހުޅުވާލާފައެވެ.

މި ފޯރަމްގައި ރަޖިސްޓްރީ ކުރުމުގެ މުއްދަތު މިމަހުގެ 25 ގެ ނިޔަލަަށް ހަމަވާނެ ކަމަށް ސީއޭ މޯލްޑިވްސް އިން ބުނެއެވެ.