ގާނޫނު އަސާސީއިން ކައުންސިލްތަކަށް ލިބިދޭ ހައްގުތަށް ހިމާޔަތްކޮށެއްދޭނެކަމަށް ވިދާޅުވެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވި ބަސްފުޅާއި އަމަލާއި ދިމާނުވާކަމަށް ވ. އަތޮޅު ކައުންސިލްގެ ރައީސް އަލީ ޝުޖާއު ވިދާޅުވެއްޖެއެވެ.

ޝުޖާއު މިފަދައިން ވިދާޅުވެފައިވަނީ ވ. ހުޅިދޫ މައްސަލައާއި ގުޅޭގޮތުން ކުރެއްވި ޓްވީޓެއްގައެވެ. 

އެގޮތުން ޝުޖާއު ވިދާޅުވީ ހުޅިދޫ މައްސަލައިގައި ސަރުކާރުން ގާނޫނުގައިވާ ގޮތަށް ތަންފީޒުކުރުމަށްވުރެ ބޮޑަށް އަމިއްލަ ފަރާތެއްގެ މަސްލަހަތު ސަރުކާރުން އިސްކުރާކަން ފާހަގަކުރެވޭކަމަށެވެ. އަދި އެއީ ވަރަށް ހިތާމަ ކުރާަކަމެއްކަމަށް ޝުޖާއު ވިދާޅުވިއެވެ. 

Advertisement

ދަނޑުވެރިކަމުގެ މަސައްކަތަށް ދޫކޮށް، މިހާތަނަށް މަސައްކަތެއްނުކޮށް ގުދަނެއްގެ ގޮތުގައި ބޭނުން ކުރަމުން އަންނަ ވ. ހުޅިދޫ ކުއްޔަށް ދިނުމުގެ އެގްރިމެންޓު ބާތިލުކޮށް އެ އަތޮޅު ރައްޔިތުންނާ ރަށް ހަވާލު ކުރުމަށް ގޮވާލާ ކައުންސިލުން އިސް ނަގައިގެން ވަނީ މުޒާހަރާަތަކެއް ކޮށްފައެވެ. 

ވ. އަތޮޅު ކައުންސިލާއި ބައެއް ރައްޔިތުން ހުޅުދޫއަށް ގޮސް އެ ރަށުގައި ތިބެގެން މުޒާހަރާ ކޮށްފައިވާއިރު، އެމީހުން އެ ރަށުން ބޭލުމަށް ފުލުހުންވެސް ވަނީ ހަރަކާތްތެރިވެފައެވެ. 

އެހެން ނަމަވެސް އެފަހުން އެ މައްސަލައަށް ހައްދުހޯދުމަށް މަޝްވަރާކުރުމަށް މުޒާހަރާތައް ވަނީ މެދުކަނޑާލާފައެވެ. 

ވ. އަތޮޅު ކައުންސިލުން ބުނިގޮތުގައި ހުޅިދޫ މައްސަލައަށް ހައްލެއް ހޯދާދިނުމަށް އެދި ސަރުކާރުގައި ދަންނަވާފައިވާތާ 15 މަހަށްވުރެ ގިނަ ދުވަސް ވެގެން ދިޔައިރު، އެމީހުންނަށް އެދެވޭ ޖަވާބެއް ދީފައެއް ނުވެއެވެ. 

ހުޅިދޫ ވ އަތޮޅު ކައުންސިލގެ އިހުތިސާސްގެ ތެރެއަށް ގެނައުމަށް އަޑުއުފުލަން ފެށީ ސަރުކާރުގެ ފަރާތުން އެކަމަށް އެކަށީގެންވާ އެއްބާރުލުމެއް ލިބިފައި ނުވާތީކަމަށް އެކައުންސިލުން ވަނީ ހާމަކޮށްފައެވެ. 

އެހެން ނަމަވެސް މިހާރު ކުރިއަށްދާ މަޝްވަރާތަކުގެ ތެރެއިން ހައްލަކާއި ހަމަޔަށް އާދެވިދާނެކަމަށް އުންމީދުކުރާކަމަށް ވ. އަތޮޅު ކައުންސިލްގެ ރައީސް ވަނީ ވިދާޅުވެފައެވެ.