ނުރައްކާތެރި ބައްޔެއް ކަމަށްވާ އެބޯލާ ފެތުރެމުންދާތީ ޔުގާންޑާގެ ދެ ސަރަހައްދެއް ފުރަބަންދުކޮށްފިއެވެ.

އެގޮތުން ޔުގާންޑާގެ ދެ ސަރަހަެއްދެއް ކަމަށްވާ މުބެންޑޭ އާއި އަވަށްޓެރި ކަސަންދާގެ ބާތަކާއި ނައިޓްކްލަބްތަކާއި އަޅުކަން ކުރާ ތަންތަނާއި މުނިފޫހިފިލުވުމުގެ ތަންތަން ބަންދުކޮށް ކާފިއު ހިންގަން މިހާރު ވަނީ ނިންމައިފަ އެވެ. މި ދެ ސަރަހައްދުގެ ހުރިހާ ހަރަކާތެއް 21 ދުވަހަށް ވަނީ މެދުކަނޑާލާފަ އެވެ.

އަދި މުދާ އުފުލާ ޓްރަކްތަކަށް އެ ސަރަހައްދުތަކަށް ވަދެ ނިކުތުމުގެ ހުއްދަ ދޭނެ ކަމަށާއި، ނަމަވެސް އެހެން ހުރިހާ ޓްރާންސްޕޯޓްތަކެއް ހުއްޓާލާނެ ކަމަށް އެގައުމުގެ ރައީސް ވަނީ ވިދާޅުވެފައެވެ.

Advertisement

މި ބަލި ޖެހިގެން އެގައުމުގައި 29 މީހުން މަރުވެފައިވާ ކަމަށް ރިޕޯޓުތައް ބުނާއިރު، 63 މީހަކަށް ބަލި ޖެހިގެން ރިޕޯޓުކޮށްފައިވާ ކަމަށް ދުނިޔޭގެ ސިއްޙަތު ޖަމްއިއްޔާ ޑަބްލިޔު.އެޗް.އޯ އިން ބުނެއެވެ.

ޔުގާންޑާގައި މި ބަލި ޖެހިފައިވާ މީހުންގެ ތެރޭގައި، މީގެ ކުރިން ބަލި ޖެހުނު މީހުންނަށް ފަރުވާ ދިނުމުގެ މަސައްކަތުގައި ހަރަކާތްތެރިވި ޞިއްޙީ ޚިދުމަތްތެރިން ވެސް ހިމެނޭ ކަމަށް ރިޕޯޓުތައް ބުނެއެވެ.

މި ބަލި ޖެހިފައިވާ ޞިއްޙީ ޚިދުމަތްތެރިންގެ ތެރެއިން ފަސް މީހަކު މިހާރު ވަނީ ބަލިން ފަސޭހަވެފައެވެ. އެ މީހުންނަށް ފަރުވާ ދީފައި ވަނީ އެންޓެބޭގައި ހުންނަ ޞިއްޙީ ފަރުވާދޭ މަރުކަޒެއްގައެވެ. މި ބަލި ޖެހިފައިވާ މީހުންގެ ތެރެއިން ޖުމުލަ 20 މީހަކު ބަލިން ފަސޭހަވެފައިވާ ކަމުގައި އެ ޤައުމުގެ ޞިއްޙީ ވުޒާރާއިން ހާމަކުރެއެވެ.

ޔުގާންޑާގެ ބައެއް ސަރަޙައްދުތަކުގައި ހަލުވިކަމާ އެކު އެބޯލާ ފެތުރެން ފެށުމާ އެކު ބައެއް ޤައުމުތަކުން ވަނީ ރައްކާތެރިކަމުގެ ފިޔަވަޅުތައް އަޅާފައެވެ. މީގެ ތެރޭގައި އެމެރިކާ ހިމެނެއެވެ. އެ ޤައުމުން ވަނީ، ޔުގާންޑާއަށް ދަތުރު ކޮށްފައި އެނބުރި އެ ޤައުމަށް އަންނަ މީހުން ސްކްރީން ކުރުމުގެ މަސައްކަތް ފަށާފައެވެ.

އެބޯލާ ވައިރަސް ޑިޒީޒް (އީ.ވީ.ޑީ) ނުވަތަ އެބޯލާއަކީ ޖަނަވާރުންގެ ފުށުން އިންސާނުންގެ ހަށިގަނޑަށް އަރާ ނުރައްކާތެރި ބައްޔެކެވެ. މި ބަލި ފަތުރާ ޖަނަވާރުތަކުގެ ތެރޭގައި ވައު، ޕޯކިޔުޕައިން އަދި ރާމާމަކުނު ހިމެނެއެވެ.