ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކުޅިވަރު ސިޔާސަތުގެ ތެރެއިން ރާއްޖެއަށް ވަރަށް ގިނަ ކަންކަން ހާސިލު ވެފައިވާ ކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެ އެވެ.

ސަން އައިލެންޑް ރިސޯޓުގައި މިހާރު ކުރިއަށްދާ "ވޮލީބޯލް ވޯލްޑް ބީޗް ޕްރޯ ޓުއާ 2022" ގެ ތެރެއިން މިނިސްޓަރު މަހްލޫފް ވިދާޅުވީ ރާއްޖޭގެ ގައުމީ ޓީމުގެ ކުޅުންތެރިންނަށް ގިނަ ފުރުސަތުތަކެއް ހޯދައިދީ އަދި ފުރުސަތުތައް ޕްރޮމޯޓް ކުރުމަށްޓަކައި ރާއްޖޭގައި ބައިނަލްއަގްވާމީ މުބާރާތްތައް ބޭއްވުމަކީ ރައީސް ޞާލިހުގެ ރިޔާސީ ވައުދުފުޅެއް ކަމަށެވެ.

އަދި މިއީ ރާއްޖޭގައި މިގޮތަށް ބާއްވާ އެންމެ ބޮޑު މުބާރާތް ކަމަށްވާއިރު، މިއީ އެންމެ މައްޗަށް ރޭންކު ކުރެވޭ ފެންވަރުގެ ބޮޑު މުބާރާތެއް ކަންވެސް މަހްލޫފް ފާހަގަކުރައްވިއެވެ. އެގޮތުން މި މުބާރާތުގައި އެންމެ ޓޮޕް ލެވެލްގެ އެތްލީޓުންނާއި ވޯލްޑް ޗެމްޕިއަނުން ބައިވެރިވާ ކަމަށްވެސް މަހްލޫފް ވިދާޅުވިއެވެ. 

Advertisement

މީގެ އިތުރުން މަހްލޫފް ވިދާޅުވީ، މިއަހަރުގެ ތެރޭގައި މިހާތަނަށް ބައިނަލްއަގްވާމީ ހަ މުބާރާތެއް ރާއްޖޭގައި ބާއްވާފައިވާ ކަމަށާއި މިއަހަރު ނިމޭއިރު މިގޮތަށް 10 މުބާރާތް ބޭއްވޭނެ ކަމަށެވެ.

"އަޅުގަނޑު ގަބޫލުކުރަން ރައީސުލްޖުމްހޫރިއްޔާގެ ކުޅިވަރު ސިޔާސަތު ކުރިއަރުވަން މިކުރާ މަސައްކަތުގެ ތެރެއިން ހަމަގައިމު ވެސް މިކަހަލަ ބައިވަރު ކަންތައްތަކެއް އަޅުގަނޑުމެންނަށް މިވަނީ ހާސިލް ކުރެވިފައި،" މަހްލޫފް ވިދާޅުވި އެވެ.

ސަން އައިލެންޑްގައި ކުރިއަށް ގެންދާ މި މުބާރާތުގައި ދުނިޔޭގެ 28 ގައުމަކުން 200 އަށްވުރެ ގިނަ އެތުލީޓުން ބައިވެރިވެފައިވެ އެވެ. މުބާރާތް މިމަހުގެ 13 ވަނަ ދުވަހު ފަށާފައިވާއިރު، މާދަމާ ނިމޭނެ އެވެ.