ރާއްޖޭގައި ދަނޑުވެރިކަން ކުރަމުންދާ ފަރާތްތަކަށް ޚާއްސަ އިންޝިއުރެންސް ޕެކޭޖުތަކެއް އެކުލަވާލުމުގެ މަސައްކަތް ކުރަމުންދާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވެފައިވަނީ ދަނޑުވެރިންގެ ދުވަސް ފާހަގަކުރުމަށް ރައީސުލްޖުމްހޫރިއްޔާ ކާށިދޫއަށް ކުރެއްވި ދަތުރުފުޅުގައި އެ ރަށުގެ ދަނޑުވެރިންނާއި ބައްދަލުކުރައްވާ ދެއްކެވި ވާހަަކަފުޅެއްގައެވެ.
އެ ބައްދަލުވުމުގައި ކާށިދޫގެ ދަނޑުވެރިން ވަނީ އެ މަސައްކަތް ކުރުމަށް އެ ފަރާތްތަކަށް ދިމާވާ ގޮންޖެހުންތަކާއި މަސައްކަތްކުރުމަށް ދިމާވާ ދަތިތައް ރައީސުލްޖުމްޙޫރިއްޔާއާ ހިއްސާކުރައްވާފައެވެ.
އެގޮތުން ދަނޑުވެރިކަން ކުރުމުގައި ބިން ލިބުމުގައި ދިމާވާ ދަތިތަކާއި ބިމެއް ނެތި ރަނގަޅު ދަނޑުވެރިކަމެއް ނުކުރެވޭނެކަން ވަނީ ފާހަގަކޮށްފައެވެ. އަދި ލޯނު ލިބުމުގައި ދިމާވާ ދަތިތަކަކާއި ދަނޑުތަކަށް ދިމާވާ ތަފާތު ބަލިތަކުގެ ވާހަކަތައްވަނީ ހިއްސާކޮށްފައެވެ.
ދަނޑުވެރިންގެ ވާހަކަތައް އަޑުއެއްސެވުމަށްފަހު ރައީސުލް ސޯލިހު ވިދާޅުވީ ދަނޑުވެރިކަން ކުރިއެރުވުމަށްޓަކައި ސަރުކާރުން މަސައްކަތްކޮށްދެއްވާނެކަމަށެވެ. އެގޮތުން ދަނޑުވެރިކަން ކުރުމަށް ޚާއްސަ އިންޝުއަރެންސް ޕެކޭޖެއް ތަޢާރަފުކުރުމުގެ މަސައްކަތް މިހާރު ސަރުކާރުން ކުރަމުންދާކަމަށެވެ.
އެހެން ނަމަވެސް އެ އިންޝއިރެންސް ދަނޑުވެރިންނަށް ލިބޭނެ ސީދާ ތާރީހެއް ރައީސް ސޯލިހު ވިދާޅުވެފައެއް ނުވެއެވެ.
ދަނޑުވެރިންގެ ދުވަސް ފާހަގަކުރުމަށް ރައީސް ސޯލިހު ކާށިދޫއަށް ވަޑައިގެންފައިވާއިރު، އެމަނިކުފާނުގެ އަރިހުގައި މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ހުސެއިން ރަޝީދު ހަސަންއާއި އިކޮނޮމިކް މިނިސްޓަރ ފައްޔާޒު އިސްމާއީލްގެ އިތުރުން ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ ބައިވެރިވެވަޑައިގެންފައެވެ.
ރައީސް ސޯލިހުގެ މި ދަރުތުފުޅުގައި ވަނީ ދަނޑުވެރިންގެ ދުވަހާއި ގުޅުވައި ކ.ކާށިދޫގައި ބާއްވާފައިވާ ދަނޑުވެރިންގެ މައުރަޒަށްވެސް ޒިޔާރާތްކުރައްވާފައެވެ.
ދަނޑުވެރިންގެ މި މައުރަޒުގައި 19 ފަރާތަކުން ބައިވެރިވެފައިވާއިރު އޭގެތެރެއިން 8 ފަރާތަކީ ކާށިދޫގެ ދަނޑުވެރިންނެވެ.
Advertisement
This content is created and paid for by advertisers and does not involve Voice Journalists
