ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމަށް އިންތިހާބު ވުމުގެ ކުރިން ދިވެހިންނަށް ވެވަޑައިގެންނެވި ވައުދު ތަކުގެ ތެރެއިން 95 އިންސައްތަ ޕްރޮޖެކްޓްތައް ކުރިއަށްދާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އަމީރު މިފަދައިން ވިދާޅުވީ، ދައުލަތުގެ އާމްދަނީ ފޯކާސްޓަށް ބަލައި ތަރައްގީގެ މަޝްރޫއުތައް މަޑުޖައްސާލަންޖެހޭ ހާލަތެއް އައިސްދާނެތޯ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބުދެއްވަމުންނެވެ.

އެގޮތުން އަމީރު ވިދާޅުވީ މިހާރުގެ ދަތި ހާލަތުގައިވެސް ރައީސް ވެފަ ހުރި ވައުދުތަކުގެ 95 ޕަސެންޓަށްވުރެ މަތީގައި ޕްރޮޖެކްޓުތައް ހިނގަމުންދާ ކަމަށެވެ.

Advertisement

"ހަގީގަތުގައި އަޅުގަނޑުމެން މިހާރުވެސް މިދަތީގައިވެސް އަޅުގަނޑުމެން މިހާރު 2023 ވަނަ އަހަރުގެ ބަޖެޓު އެކުލަވާލަން މަސައްކަތް ކުރަމުންދާއިރު، ރާއްޖޭގެ ގިނަ ރަށްތަކުގައި ހަމަ މި ސަރުކާރުން ރައީސް ވެފަ ހުރި ވައުދުތަކުގެ 95 ޕަސެންޓަށްވުރެ މަތީގައި އަޅުގަނޑުމެންނަށް ޕްރޮޖެކްޓުތައް އެބަ ހިންގޭ،" އަމީރު ވިދާޅުވި އެވެ.

ރާއްޖޭގެ އެންމެ ދެކުނުން ފެށިގެން އުތުރަށްވެސް ޕްރޮޖެކްޓްސްތައްވެސް މިހާރުވެސް ކުރިއަށްދާ ކަމަށާ އެކަމަށް ހުއްޓުމެއް ނާންނާނެ ކަމަށްވެސް އަމީރު ވިދާޅުވިއެވެ.  

"ރާއްޖޭގެ އުތުރުން ގޮއްސަ، އެންމެ ދެކުނާ ހަމައަށްވެސް ހަމަ ގިނަ ރަށްރަށުގައި ހަމަ ވަރަށް ގިނަ ޕްރޮޖެކްޓުތައް އެބަ ހިންގޭ. މީގެ މަސައްކަތްތައް މި ދަތިތަކާ އެއްކޮށްވެސް ނުހުއްޓި، ކުރިއަށްދާ ވާހަކަ އަޅުގަނޑު ފާހަގަކޮށްލަން." އަމީރު ވިދާޅުވިއެވެ. 

މީގެ އިތުރުން މިނިސްޓަރު އަމީރު ވިދާޅުވީ، މާލޭ ރައްޔިތުންނަށް ބޯހިޔާވަހިކަން ހޯދައިދެއްވާނެ ކަމަށް ރައީސް ސޯލިހު ވެވަޑައިގެންނެވި ވައުދު ފުއްދެއްވުމަށް މަސައްކަތް ކުރައްވަމުން ގެންދަވާ ކަމަށާއި، އެކަމަށްޓަކައި ގޯތި ދޫކުރުމަށް ގުޅިފަޅުން ބިން ހިއްކަން ބޭނުންވާ ފައިސާގެ ލޯނުގައި ސޮއި ކުރެވިފައިވާ ކަމަށެވެ. އަދި އެފައިސާ އަންނަ 2023 ވަނަ އަހަރުގެ ބަޖެޓުގައިވެސް ހިމަނާނެކަމަށް މިނިސްޓަރު އަމީރު ވިދާޅުވި އެވެ.