ރާއްޖޭގައި ހުންނަ އިންޑިއަން ހައިކޮމިޝަންގެ ފަސްޓް އޮފިސަރ ދީޕަކް ސުނިތާ އާއި އޭނާގެ އަންހެނުންނާ ދެމެދު މާރާމާރީ ހިންގައި ފުލުހުން ހަރަކާތްތެރިވެއްޖެއެވެ.

ވޮއިސްއަށް ފުލުހުން މައުލޫމާތު ދިންގޮތުގައި ހުޅުމާލެ ރެނާޓަސް އިމާރާތުގައި އުޅޭ ބިދޭސީ ދެމަފިރިން ދެމެދު ހަމަ ނުޖެހުމެއް ހިންގައިގެން ފުލުހުން ހަރަކާތްތެރިވެފައިވާކަމަށާއި, ނަމަވެސް ފިރިހެން މިހާގެ (އިންޑިއަން ހައިކޮމިޝަންގެ ފަސްޓް އޮފިސަރ ދީޕަކް ސުނިތާ) މިހާތަނަށް ފުލުހުންނަށް އެއްބާރުލުން ދީފައިނުވާކަމަށެވެ.

މި މައްސަލާގައި ހައިކޮމިޝަންގެ ފަރާތުންވެސް މިހާރު ހަރަކާތްތެރިވަމުން އަންނަަކަމަށް ފުލުހުން މައުލޫމާތު ދެއްވައެވެ. 

މި ހަމަނުޖެހުން ހިނގުމަށް މެދުވެރިވެފައިވަނީ, ދީޕަކް ސުނިތާ ކައިވެނީގެ ބޭރުން ދިވެހި އަންހެނަކާއެކު ސިއްރު ގުޅުންތަކެއް ބޭއްވުމުގެ ސަބަބުންކަމަށް ދީޕަކް ސުނިތާގެ އަންހެނުން ފަރާތުން މައުލޫމާތު ލިބިފައިވެއެވެ. އަދި މިކަން ފަޅާއެރުމުން އަންހެން މީހާ މަރާލުމަށް މަަސައްކަތްކުރިކަމަށް އަންހެން މީހާ ތުހުމަތުކުރެއެވެ. 

ފުލުހެއް ނަން ނުޖެހުމަށް ޝަރުތުކޮށް މައުލޫމާތު ދިންގޮތުގައި އަންހެން މީހާގެ ކަރުގައި ޒަހަމްތަކެއް ފެންނަ ހުއްޓެވެ. އަދި ފިރިހެން މީހާ އަތުންވެސް ވަކި އަޅާފައިވުމުގެ ސަބަބުން ޒަހަމްވެފައިވެއެވެ. އެއީ އަންހެންމިހާ ކަރުގައި ހިފުމުން ސަލާމަތްވުމަށް މަސައްކަތް ކުރަން އަޅާފައިވާ ވަކި ކަމަށް އަންހެން މީހާ މައުލޫމާތު ދީފަައިވެއެވެ.

މި ދެމަފިރިން ދެމެދު ހަމަ ނުޖެހުން ހިނގާފައިވާއިރު, އެގޭގައި އެދެމަފަރިންގެ 2 އަހަރުގެ ކުޑަ ދަރިފުޅުވެސް އުޅެއެވެ. މިއީ ގެވެށި އަނީގެ މައްސަލައަކަށް ވެފައި, ޖެންޑާރ މިނިސްޓްރީން މިމައްސަލައަށް އެޓެންޑް ވެފައިވާކަން މިހާތަނަށްވެސް މިނިސްޓްރީން ސާފުކޮށްދީފައެއްނުވެއެވެ.

މި ހާދިސާ ހިނގާފައިވަނީ އޮކްޓޯބަރު 14 ވީ ހުކުރު ދުވަހުގެ ރޭގައި ނަމަވެސް, މިހާތަނަށް ދީޕަކް ސުނިތާ ފުލުހުންނަށް އެއްބާރުލުން ދީފައިނުވާކަމަށް ފުލުހުން މައުލޫމާތު ދެެއެވެ.

ޑިޕްލޮމެޓް ޕާސްޕޯޓުގައި ރާއްޖޭގައި ހަރަކާތްތެރިވާ ފަރާތްތައް ކުށްކުރިކަމުގައި ވީނަމަވެސް ދިވެހި ސަރުކާރަށް ފިޔަވަޅު އެޅުމުގެ ބާރެއް ލިބިފައެއްނުވެއެވެ. 

މިވަގުތު ރާއްޖޭގައި އެންބަސީތަކުގެ މުވަޒަފުންގެ އިތުރުން ރާއްޖޭގައި ހަރަކާތްތެރިވާ އިންޑިއާގެ ސިފައިންވެސް ހަރަކާތްތެރިވަމުން އަންނަނީ ޑިޕްލޮމެޓް ޕާސްޕޯޓުގައިކަން ފާހަގަކޮށްލަން ޖެހެއެވެ.