ރައީސުލްޖުމްހޫރިއްޔާ އޮފީހުގެ ޗީފް އޮފް ސްޓާފް އަލީ ޒާހިރު، ފައިސާ ނަގައިގެން ގައިދީންގެ އަދަބު ލުއިކޮށްދީ މާފުދެމުން އަންނަ ކަމަށް ރައްޔިތުން މަޖިލީހުގެ މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ތުހުމަތު ކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ޓެގް ކުރައްވައި ޓޮމް ކުރެއްވި ޓުވީޓެއްގައި ވިދާޅުވީ، މާފުދިނުމާއި އަދަބު ލުއިކޮށްދިނުމުގެ ގޮތުން ރައީސް އޮފީހުން ނިންމާ ނިންމުންތައް، ބާޒާރުގައި އަގު ނަގާ އުސޫލުން އަގު ނަގައިގެން ޗީފް އޮފް ސްޓާފު އަލީ ޒާހިރު ވިއްކަމުން އަންނަކަމަށެވެ.
އަދި އެކަން އެގޮތަށް ކުރުން ހުއްޓަވައިދެއްވުމަށްވެސް ޓޮމް ވަނީ ރައީސް ޞާލިހުގެ އަރިހުން ދަންނަވާފައެވެ.
މާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ހުކުމުގެ ވަކި މިންވަރެއް ތަންފީޒުކޮށް ނިމިފައިވާ މީހުންނަށް މާފު ދިނުމާއި އިސްތިއުނާފު ކުރުމުގެ ފުރުސަތު ގެއްލިފައިވާ މީހުންގެ އަދަބު ލުއި ކޮށްދިނުމުގެ ބާރު ރައީސުލްޖުމްހޫރިއްޔާ އަށް ލިބިގެން ވެއެވެ.
އެގާނޫނުގެ ދަށުން ހުކުމް މާފު ކޮށްދިނުމާއި އަދަބު ލުއި ކުރުމުގެ ގޮތުން ކުރަން ޖެހޭ އިދާރީ ކަންކަން ކުރައްވާނީ ރައީސުލްޖުމްހޫރިއްޔާގެ އޮފީހުންނެވެ. އަދި އަލީ ޒާހިރަކީ ޗީފް އޮފް ސްޓާފްގެ ހައިސިއްޔަތުން ރައީސުލްޖުމްހޫރިއްޔާ ނިންމަވާ ނިންމެވުންތައް ތަންފީޒު ކުރެއްވުމުގައި އެންމެ އިސްކޮށް ހުންނަވާ ބޭފުޅާއެވެ.
Advertisement
This content is created and paid for by advertisers and does not involve Voice Journalists
