އިންޑޮނޭޝިއާގެ ފުޓްބޯޅަ ދަނޑެއްގައި މިދިޔަ މަހު ހިނގި ހަމަނުޖެހުމެއްގައި 131 މީހުން މަރުވި ހާދިސާއަށްފަހު އެ ފުޓްބޯޅަ ސްޑޭޓިއަމް ތަޅާލަން ނިންމައިފިއެވެ.

މި ހާދިސާ ހިނގާފައިވަނީ އިންޑޮނީޝިއާގެ ކަންޖޫރުހަމް ސްޓޭޑިއަމްގައެވެ. އިންޑޮނޭޝިއާ ލީގުގެ ފުޓްބޯޅަ މުބާރާތުގެ މެޗެއް ނިންމާލި ތަނާ ސަޕޯޓަރުންތަކެއް ދަނޑުމައްޗަށް އެރުމުން ފުލުހުންނަށް ކޮންޓްރޯލް ނުވެ ފިތިބާރު ވެގެން އެތައް ބަޔަކު ވަނީ މަރުވެފައެވެ.

އިންޑޮނީޝިއާގެ ރައީސް ޖޯކޯ ވިޑޯޑޯ ވިދާޅުވީ ކަންޖޫރްހަމް ސްޓޭޑިއަމް ތަަޅާލަން ނިންމާފައިވާ ކަމަށާއި، މަލަންގްގެ ކަންޖުރުހާން ސްޓޭޑިއަމް އަލުން ހަދާނީ ކުޅިވަރުގެ މައި އިދާރާ ފީފާއިން ކަނޑައަޅާފައިވާ ރައްކާތެރިކަމުގެ މިންގަނޑުތަކާ އެއްގޮތަށް ކަމަށެވެ. ވިޑޯޑޯ މިކަން ހާމަކުރެއްވީ ފީފާގެ ރައީސް ޖިއާނީ އިންފަންޓީނޯއާ މިއަދު ބައްދަލުކުރެއްވުމަށްފަހުއެވެ.

Advertisement

ކަންޖޫރުހަމް ސްޓޭޑިއަމްގައި ހިނގި މި ހާދިސާގައި ހަމަނުޖެހުން ބޮޑުވެ ކަރުނަ ގޭސް ޖެހި އިރު އެ ތަނުން ނުކުންނަށް މަސައްކަތް ކުރި އެތައް ސަތޭކަ މީހުން ފިތި ބާރުވެގެން މަރުވި އިރު، އަނިޔާވި ބައެއް މީހުން ހޮސްޕިޓަލަށް ގެންދަނިކޮށް މަރުވެފައިވާ ކަމަށް އެގައުމުގެ މީޑިއާ ރިޕޯޓުތައް ބުނެއެވެ.

އިންޑޮނޭޝިއާގެ ފުޓްބޯޅަ އެސޯސިއޭޝަންއިން ވަނީ އެ މައްސަލަ ބަލާނެ ކަމުގެ ޔަގީންކަން ދީފައެވެ. އަދި އިންޑޮނޭޝިއާ ލީގުގެ މެޗުތައް އެއް ހަފްތާއަށްވެސް މެދުކަނޑައިލިއެވެ.

އިންޑޮނީޝިއާގެ ފުޓްބޯޅަ ސްޓޭޑިއަމެއްގައި ހިނގި ހަމަނުޖެހުމެއްގައި ކުޅުންތެރިންތަކެއް މަރުވެފައިވާއިރު، މީގެ ކުރިން 2012 ވަނަ މިސްރުގެ ފުޓްބޯޅަ ސްޓޭޑިއަމްއެއްގައި ހިނގި ހަމަނުޖެހުމެއްގައި ވެސް 70 އަށް ވުރެ ގިނަ މީހުން މަރުވެފައިވެއެވެ.