ޓެލެގްރާމްގައި އެކި ނަންނަމުގައި ގުރޫޕްތައް ހަދައި، އަގުދީގެން ނުބައި ފާހިޝް ކަންކަމާއި، ބޮޑެތި ކުށްތައް ކުރުން އާއްމު ކަމަކަށް ހެދުމުގެ މަސައްކަތް ކުރިއަށްދާ ކަން އެކިފަހަރު މަތިން ފެންމަތިވަމުން ގޮސްފައިވެއެވެ. އެފަދަ ގުރޫޕު ގިނަވެ, ހައްދުން ނެއްޓޭ ހިސާބަށް މިވަނީ ގޮސްފައެވެ.

ޓެލެގްރާމްގައި ހިންގަމުންދާ އެފަދަ ގުރޫޕެއްގައި މީހުންގެ ތެރޭގައި ދެކެވިފައިވާ ވާހަކަތަކުގެ ސްކްރީން ޝޮޓް "ވޮއިސް" އަށް ލިބިފައިވާއިރު، އެ ގްރޫޕަށް މެސެޖު ކުރި މީހަކު ވަނީ، އަގެއް ކިޔުމަށްފަހު އެ އަގުގައި މީހަކު މަރާލާނެ މީހަކު ހޯދާކަމަށް ބުނެފައެވެ.

އެގޮތުން، އެކަން ކޮށްދޭ މީހަކަަށް 25000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، އޭނާ މީހަކު މަރާލަން ބޭނުން ވާ ސަރަހައްދު ވެސް ވަނީ ހާމަކޮށްފައެވެ. 

Advertisement

މީގެ އިތުރުން، އެގުރޫޕަށް އިތުރު މީހުން ކޮށްފައިވާ މެސެޖުތަކުގައި، ހަށިވިއްކުމާއި، އެއްޖިންސުން ގުޅުން ހިންގުމާއި، މަސްތުވާތަކެތި ވިއްކުމާއި، އެފަދަ ކަންކަން ކޮށްދޭނެ މީހުންނާއި، އެފަދަ ކަންކަން ކުރަމުން އަންނަ ކަމަށް ފާޅުގައި އެއްބަސްވެ އެކަން ކުރަން ބޭނުންވާ މީހުންނަށް އެފުރުސަތު އޮތްކަމަށް ވަނީ ހާމަކޮށްފައެވެ. 

ޓެލެގްރާމް ސްރީން ސޮޓް

މިފަދަ ނުބައި ފާހިޝް ޢަމަލުތަކުގެ އިތުރުން، ސިހުރު ހެދުން ފަދަ ދީނުން ބޭރުވާ، ދީނުގައި ބޮޑެތި ހަރާމް ކަންކަންވެސް އާއްމުކޮށް އެކި މުހުތާދުތައް ފުރިހަމަ ކުރުމަށް، އެފަދަ ފައިދާއެއް ނެތް ގެއްލުންހުރި ބޮޑެތި ފާފަތަކަށް އަރައިގަންނަން ތައްޔާރު މީހުން ތިބިކަން މެސެޖުތަކުން ހާމަވާއިރު, ބޮޑު އަގުގައި އެކަން ކޮށްދޭ މީހުންވެސް ތިބިކަން ހާމަވެއެވެ. 

4800 އަށްވުރެ ގިނަ މީހުން ތިބި މި ޓެލެގްރާމް ގުރޫޕުގެ މެސެޖުތަކެއް ދާދިފަހުން ވެސް މީސްމީޑިއާގައިވަނީ އާއްމުވެފައެވެ. އެހެން ނަމަވެސް އަދި އަދަށް ދާންދެންވެސް އެކަން ކުރިއަށްދާއިރު، ކަމާބެހޭ މުއައްސަސާތަކުން އެކަން ހުއްޓުވައި، އެ ޓެލެގްރާމް ޗެނަލް ބަންދުކޮށްފައެއް ނުވެއެވެ.

މިފަދަ އެތައް ގުރޫޕެއްގެ މައްސަލަ ފުލުހުންގެ މީޑިއާ ވަޓްސްއަޕް ގުރޫޕަށް ފޮނުވައި މިކަންކަމަށް ފިޔަވަޅު ނާޅާ މައްސަލާގައި އެތަކެއް ނޫސްވެރިންނެއް ފުލުހުންނާއި ކޮށްފައިވާ ސުވާލުތަކަށް ޖަވާބެއް ދެވިފައިނުވާކަން ފާހަގަކޮށްލަންޖެހެއެވެ.

ނުބައި ވީހާ ފާހިޝް ޢަމަލުތަކަކާއި، ބޮޑެތި ފާފަތަކާއި ކުށްތައް މިފަދަ ހާމަކަން ބޮޑު ގޮތެއްގައި ކުރަމުންދާއިރު، އެކަންކަން ނުހުއްޓުވައި، އެކަމާއި ގުޅޭ ގޮތުން ސަރުކާރުން ބީރުކަންފަތެއް ދެމުން އަންނާތީ ގިނަ ބައެއްގެ ފާޑުކިޔުންތައް އަންނަނީ ސަރުކާރަށާއި، ހޯމް މިނިސްޓަރ ޢިމްރާން އަދި ކޮމިޝަނަރ އޮފް ޕޮލިސް މުހައްމަދު ހަމީދަށް އަމާޒުވަމުންނެވެ.