ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރ އިބްރާހިމް ވަހީދު (އިބުރޭ) ގެ ވާހަކަ އާންމު ތަންތަނުގައި ދައްކަވަން ލަދުގަންނަ ކަމަށް އެކުންފުނީގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެ އެވެ.
ފެނަކައިގެ ޗެއާމަން މުހަންމަދު ރަޝީދާއި އެމްޑީ އަހުމަދު ސައީދު އަށް ކޮރަޕްޝަންގެ ތުހުމަތުކޮށް މިއަދު ރައްޔިތުންގެ މަޖިލީހުގައި ވާހަކަ ދައްކަވަމުން ސައީދު ވިދާޅުވީ، ފެނަކައިގެ ކުރީގެ ޑެޕިއުޓީ މެނޭޖިން ޑިރެކްޓަރުގެ ވާހަކަ އާންމުވާ ގޮތަށް ދައްކަން ލަދުގަންނަ ކަމަށެވެ.
ސައީދު މިހެން ވިދާޅުވުން މަޖިލީހުގައި ތިއްބެވި ބައެއް މެންބަރުން ވަނީ ސަބަބު އޮޅުންފިލިވުމަށް ސައީދާއި ސުވާލުކުރައްވާފައެވެ. އެހެން ނަމަވެސް އެސުވާލަށް ޖަވާބެއް ދީފައެއް ނުވެއެވެ.
މީގެ އިތުރުން ދަގެނތީ ދާއިރާގެ މެމްބަރު މުހައްމަދު ނާޒިމް ވަނީ ހަތަރު އަހަރު ވަންދެން އިބުރޭ ޑީއެމްޑީ އަކަށް ހުންނެވި އިރު ވެސް ފިޔަވަޅެއް ނާޅާ އޮތީ ކީއްވެ ތޯ ސުވާލު ކުރައްވާފަ އެވެ. އަދި ސީރިއަސް މައްސަލަ ތަކެއް ދިމާވެއްޖެނަމަ ފިޔަވަޅު އަޅާނެ އުސޫލެއް އެ ކުންފުނީގައި ނެތީ ތޯ ވެސް ނާޒިމް އެއްސެވި އެވެ.
އެސުވާލަށް ޖަވާބު ދެއްވަމުން ސައީދު ވިދާޅުވީ ފެނަކައިގައި ޑިސިޕްލިނަރީ އަދި ހެރެސްމަންޓް ކޮމެޓީތައް އޮންނަ ކަމަށެވެ. ސައީދު ވިދާޅުވީ އިބްރާހީމް ވަހީދަށް އަޅާފައިވާނީ އެންމެ ފިޔަވަޅެއް ކަމަށާއި، އެ ފިޔަވަޅަކީ އައިޓީ ނެޓްވޯކުން ދީފައިވާ އެކްސެސްއެއް ކަނޑައިލުމުގެ ފިޔަވަޅެކެވެ.
Advertisement
This content is created and paid for by advertisers and does not involve Voice Journalists
