ރާއްޖޭގައި ގަވައިދާ ޚިލާފަށް ރަޖިސްޓްރީކުރި އުޅަނދުތަކެއްގެ ރަޖިސްޓްރީ ބާތިލުކުރުން މަޑުޖައްސާލަން ސިވިލް ކޯޓުން އަމުރުކޮށްފައި އޮތް ނަމަވެސް، ބާތިލުކުރަން ފެންނަ ރަޖިސްޓްރީތައް ބާތިލު ކުރަމުންދާނެ ކަމަށް ޓްރާންސްޕޯޓް މިނިސްޓްރީން ބުނެފި އެވެ.

ޓްރާންސްޕޯޓު މިނިސްޓްރީން ވަނީ މިދިޔަ މިމަހުގެ ތެރޭގައި ގަވައިދާ ހިލާފަށް ރަޖިސްޓްރީ ކުރި އިތުރު 98 އުޅަނދެއްގެ ރަޖިސްޓްރީ ބާތިލްކޮށްފައެވެ. 

 ރަޖިސްޓްރީ ބާތިލް ކުރެވުނު އުޅަނދުތަކުގެ ތެރޭގައި ރާއްޖޭގައި ރަޖިސްޓްރީ ކުރެވޭ އުމުރު ހަމަވެފައިވާ އަދި ގަވައިދާ ހިލާފަށް މާލެ ޒޯނަށް ރަޖިސްޓްރީ ބަދަލުކޮށްފައިވާ އުޅަނދު ހިމެނޭ ކަމަށްވެސް ޓްރާންސްޕޯޓް މިނިސްޓްރީން ވިދާޅުވެއެވެ. އެހެން ނަމަވެސް އޭގެ ތެރެއިން ބައެއް ފަރާތްތަކުން ސިވިލް ކޯޓަށް މައްސަލަ ހުށަހެޅުމުން, ރަޖިސްޓްރީ ބާތިލްކުރަން މަޑުޖައްސާލަން އަމުރެއްވެސް ވަނީ ނެރެފައެވެ.

އެ މައްސަލާގައި ޓްރާންސްޕޯޓް މިނިސްޓްރީން ވިދާޅުވީ، ސިވިލް ކޯޓުން އެގޮތަށް ހުކުމެއް ނެރެފައި އޮތް ނަމަވެސް، މިނިސްޓްރީން ބާތިލް ކުރުމަށް ފެންނަ އެއްޗެއް ބާތިލްކުރަމުން ގެންދާނެ ކަމަށެވެ. 

މީގެ އިތުރަށް ވިދާޅުވީ، ގަވައިދާ ހިލާފަށް އުޅަނދުތަކެއް ރަޖިސްޓްރީ ކޮށްފައިވާކަން ދެނެގަނެވިފައި ވަނީ އެ މިނިސްޓްރީން ކުރިއަށް ގެންދިޔަ އިންޓާނަލް އޮޑިޓެއްގައި ކަމަށާއި، އެގޮތުން މިނިސްޓްރީއަށް އެޕްލިކޭޝަން ހުށަހެޅުމެއް ނެތި، ގަވައިދާ ހިލާފަށް 202 ވެހިކަލެއް ރަޖިސްޓްރީ ކޮށްފައިވާކަމަށެވެ.

ޓްރާންޕޯޓް މިނިސްޓްރީން ގަވައިދާ ޚިލާފަށް ރަޖިސްޓްރީކޮށްފައިވާ އުޅަނދުތަކެއްގެ ރަޖިސްޓްރީ ބާތިލްކޮށްފައިވާއިރު، މިިދިޔަ މަހުގެ ތެރޭގައި ވެސް ވަނީ ގަވައިދާ ހިލާފަށް ރަޖިސްޓްރީކުރި 37 އުޅަނދުގެ ރަޖިސްޓްރީ ބާތިލްކޮށްފަ އެވެ.