އިންޑޮނީޝިއާގައި ކުޑަކުދިންނަށްދޭ ހުރިހާ ވައްތަރެއްގެ ދިޔާ ބޭސް ބޭނުންކުރުން މަނާކޮށްފިއެވެ.

ކުޑަކުދިންނަށް ދޭ ހުރިހާ ދިޔާ ބޭސް ދިނުން މަނާކޮށްފައި މިވަނީ ކިޑްނީ މައްސަލައެއް ޖެހިގެން މަރުވާ ކުދިންގެ އަދަދު ގިނަވަމުންދާތީ ކަމަށް އެގައުމުގެ މީޑިއާ ރިޕޯޓުތަކުން ބުނެއެވެ. 

ކިޑްނީ މައްސަލައެއް ޖެހިގެން ކަމަށްބުނެ އިންޑޮނީޝިއާގައި ވަނީ ގިނަ އަދަދެއްގެ ކުޑަކުދިން މަރުވެފައެވެ. އެގޮތުން އެގައުމުގެ ހެލްތު މިނިސްޓްރީން އިއްޔެ ބުނެފައިވަނީ ޖަނަވަރީ މަހުން ފެށިގެން މިހާތަނަށް އެ ގައުމުގެ 241 ކުއްޖަކަށް ކިޑްނީ އިންފެޝަނެއް ކަމުގައިވާ "އެކިއުޓް ކިޑްނީ އިންޖަރީ" ޖެހިފައިވާއިރު، އޭގެ ތެރެއިން 133 ކުއްޖަކު މަރުވެފައިވާކަމަށެވެ. އެގޮތުން ގިނައިން މަރުވެފައިވަނީ 5 އަހަރުން ދަށުގެ ކުޑަކުދިންނެވެ.

ހެލްތު މިނިސްޓްރީން ބުނީ މިހާތަނަށް ބެލި ބެލުމުން އެ އިންފެކްޝަން ޖެހެނީ ދިޔާ ބޭސްތަކެއްގައި އެތިލީން ގްލައިކޯލް އަދި ޑައިތިލީން ގްލައިކޯލް ނަމަކަށްކިޔާ ދެ މާއްދާއެއް އެކުލެވޭތީކަން ޔަގީން ކުރެވިފައިވާކަމަށެވެ. އެހެން ކަމުން ސިރަޕް ބޭނުންކޮށްގެން ބޭނުންކުރާ ހުރިހާ ބޭހެއް ވިއްކުމާއި ޕްރިސްކްރިޕްޝަން ދިނުން ވަގުތީ ގޮތުން މަނާކޮށްފައިވާ ކަމަށްވެސް ބުނެފައިވެއެވެ.