ޓޫރިޒަމް މިނިސްޓްރީގެ އިސް ބޭފުޅުން ހިމެނޭ ޓީމެއް ތިލަދުންމަތީގެ ރަށްތަކަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ނެއްލައިދޫއަށް ވަޑައިގަތުމުން އެރަށު ރައްޔިތުން ތަފާތު މަރުހަބާއެއް ކިޔައިފިއެވެ.

ފާހަގަކޮށްލެވޭ ގޮތުގައި މިއީ ރާއްޖޭގެ ވަޒީރަކަށް މިފަދަ ތަފާތު ގޮތަކަށް މަރުހަބާކީ ފުރަތަމަ ފަހަރެވެ. އެ ދަތުރުގައި ޓޫރިޒަމް މިނިސްޓަރުގެ އިތުރުން އެ މިނިސްޓްރީގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ.

މިނިސްޓަރުގެ އިތުރުން ޓީމް ނެއްލައިދޫއަށް ވަޑައިގަތުމުން އެޓީމަށް މަރުޙަބާ ކިޔާފައިވަނީ "ޓޫރިޒަމް ނެތް ހދ.އަށް މަރުހަބާ"މިހެންނެވެ. މަރުހަބާ ކިޔަން ނިކުމެ ތިބި ފަރާތްތައް ވަނީ އެކި އެކި ވާހަކަތައް ލިޔެފައިވާ ޕޯސްޓަރުތައްވެސް ހިފައިގެންނެވެ.

Advertisement

އެގޮތުން އެއް ޕޯސްޓަރެއްގައިވަނީ "ކޮންމެ ރެއަކު ރަށަށް އަންނާތީ އަނބިމީހާއަށް އުނދަގޫވެއްޖެ" ކަމަށެވެ. އަދި "ޓުއަރިޒަމަށް 50 އަހަރު، ހދ. އަށް އަންނަ އަހަރު، މިއީ ހައްގު މިންވަރުތޯ،" ވެސް އެއް ބެނާގައި ލިޔެފައި ވެއެވެ.

މީގެ އިތުރުން ވައިކަރަމުރައިދޫގެ ޑައިވިން ސެންޓަރާއި، ހދ. އަތޮޅުގެ އެކި ރަށްރަށުގައި ވޯޓާ ސްޕޯޓްސް ހަރަކާތްތަކާއި، އަތޮޅުގެ ރަށްތަކުގައި ހުރި ރީތި ކުޅިތަކުގައި ކެނޯ ދުއްވުމާއި، އެ ހަރަކާތްތަކުން ޖީބަށް ޑޮލަރު ވަންނަ މަންޒަރުތައް ވަނީ ޓޫރިޒަމް މިނިސްޓަރަށް ދައްކުވައިދީފައެވެ.