ޗާގޮސް ކައިރީގައި ކަނޑުކަހާ ބޮޑުދާ އަޅަންފަށައިފިނަމަ ރާއްޖޭގެ ދެކުނުގެ އަތޮޅުތަކުގެ މަސްވެރިކަން ހަލާކުވާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސައިން ވިދާޅުވެއްޖެއެވެ.

އަލީ ހުސައިން ކުރެއްވި ޓުވީޓެއްގައި ވިދާޅުވީ، މޮރިޝަސް އަކީ އެހެންގައުމުތަކުގެ ބޮޑެތި ކުންފުނިތަކަށް ކުއްޔަށްދީގެން އެ ޤައުމަށް ނިސްބަތްވާ ކަނޑުގެ ސަރަޙައްދުގައި ކަނޑުކަހާ ބޮޑުދާ އަޅާ ބައެއް ކަމަށާއި، ޗާގޮސް ކައިރީގައި ކަނޑުކަހާ ބޮޑުދާ އަޅަންފަށައިފިނަމަ ރާއްޖެގެ ދެކުނުގެ އަތޮޅުތަކުގެ މަސްވެރިކަން ހަލާކުވެދާނެ ކަމަށެވެ.

އަލީ ހުސައިން ވިދާޅުވެފައި މިވަނީ ރާއްޖެ އާއި މޮރިޝަސްގެ އިގްތިސާދީ ހާއްސަ ސަރަހައްދާއި ކޮންޓިނެންޓަލް ޝެލްފްގެ ބައުންޑަރީ ކަނޑައަޅައިދޭން އެދި ރާއްޖެއާ ދެކޮޅަށް މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ ޓްރައިބިއުނަލް (އިޓްލޮސް) ހުށަހަޅައިގެން އުޅޭ މައްސަލާގައި ރާއްޖޭގެ ވިސްނުން ބަދަލު ނުކުރާ ކަމަށް ވިދާޅުވުމާއި ގުޅިގެންނެވެ.

އަލީ ހުސައިން އިތުރަށް ވިދާޅުވީ، ޗާގޮސް އައިލެންޑްސް ލިބެންޖެހޭނީ ޗާގޮސްގެ މީހުންނަށް ކަމަށެވެ. ޗާގޮސްއަށް ނިސްބަތްވާ މީހުން ދިރިދުނިޔޭގައި ތިއްބާ އެއްފަހަރު އިނގިރޭސީންނަށް އަނެއްފަހަރު މޮރިޝަސްއަށް ތާއީދުކުރީމާ މި ސަރުކާރަށް ރާއްޖޭފެ މަސްލަޙަތު ޙިމާޔަތް ކުރުމުގެ ޤާބިލުކަން ލިބިފައިނުވާކަން އެނގޭ ކަމަށްވެސް އަލީ ހުސައިން ވިދާޅުވިއެވެ.

ޗާގޯސް މައްސަލައާ ގުޅިގެން ރާއްޖޭން މިހާރު އަމަލުކުރަން ނިންމާފައިވާ ގޮތުގެ ސަބަބުން ރާއްޖެ އަށް އިޔާދަނުކުރޭ ވަރުގެ ގެއްލުމެއް ލިބިދާނެ ކަމަށް ބުނެ އެ މައްސަލަ ރައްޔިތުންގެ މަޖިލީހަށް ހުށަހެޅުމަށް މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވަނީ ނިންމާފައެވެ.