ސަރުކާރުން ދޭ ސަބްސިޑީ ދެމެހެއްޓެނިވި ގޮތެއްގައި ދެވޭނީ ރައްޔިތުން އަތުން ނަގާ ޓެކްސް ބޮޑުކޮށްގެންކަމަށް ސަރުކާރު ހިންގާ މައި ޕާޓީ އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވެއްޖެއެވެ. 

ރައްޔިތުންގެ އަތުން ނަގާ ޓެކްސް ބޮޑުކުރުމަށް ސަރުކާރުގެ ފަރާތުން ހުށައަޅާފައިވާ ބިލާއި ގުޅިގެން އެމްޑީޕީގެ ޕީޖީ ގުރޫޕުގެ ވިސްނުން ހާމަކުރައްވާ އަސްލަމް ވިދާޅުވީ ޓެކްސް ބޮޑު ކުރުމާއިމެދު ޕީޖީ ގްރޫޕްގެ މެމްބަރުންގެ މެދުގައި ޚިޔާލް ތަފާތުވުންތަކެއް ހުރިކަމަށެވެ.

އެހެން ނަމަވެސް ޓެކްސް ބޮޑުކުރަން ސަރުކާރުން ނިންމާފައިވަނީ އިޤްތިޞާދީ ގޮތުން ހުރި ގޮންޖެހުންތަކުން އަރައި ގަތުމަށްޓަކައި ކަމަށް އަސްލަމް ފާހަގަކުރެއްވިއެވެ. އަދި ވިދާޅުވީ ދައުލަތުން ހިލޭ ފޯރުކޮށްދޭ ބޭސްފަރުވާއާއި ކަރަންޓުގެ ޚިދުމަތްވެސް ހެޔޮ އަގެއްގައި ފޯރޮކޮށްދެވެނީ ސަރުކާރުން ވަރަށް ބޮޑު އަދަދެއް ސަބްސިޑައިޒް ކޮށްގެން ކަމަށް މެމްބަރުން ވަކާލާތު ކުރައްވާއިރު، ދެމެހެއްޓެނިވި ގޮތެއްގައި އެކަން ކުރުމަށް ޓެކްސް ބޮޑުކުރަން ޖެހޭކަމަށެވެ. 

އަސްލަމް ފާހަގަކުރެއްވި ގޮތުގައި ސަރުކާރުގެ ޚަރަދު ކުޑަކުރަން ބުނާއިރު، ބޮޑު ޚަރަދެއް ހިނގަނީ ސަބްސިޑީއަށްކަމަށް އަސްލަމް ވިދާޅުވިއެވެ. 

އަސްލަމް ވިދާޅުވީ، ސަރުކާރުގެ ޚަރަދުތައް ކުޑަކުރަން ބުނާއިރު، އެކި ސިނާއަތްތަކުން އެމީހުންގެ މުސާރަތައް ބޮޑުކުރުމަށް އެދެމުންދާކަމަށެވެ. އަދި އެކަންކަން ފުއްދާ ދިނުމަށް ޓެކްސް ނަގާ މިންވަރު އިތުރު ކުރަން ޖެހޭކަމަށް އަސްލަމް ވަނީ ވިދާޅުވެފައެވެ.

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިސްލާހު ހުށަހެޅުއްވީ ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއުއެވެ. ޝިފާއު ހުށައެޅުއްވި އިސްލާހުގައި ވަނީ ޓީޖީއެސްޓީ %12އިން %16އަށް، އަދި ޖީއެސްޓީ %6އިން %8އަށް ބޮޑުކުރުމަށެވެ.  

ޖީއެސްޓީއާއި، ޓީޖީއެސްޓީ ބޮޑުކުރުމާއި ގުޅޭގޮތުން އެމްޑީޕީގެ ޕީޖީ ގުރޫޕިގައި ޚިޔާލު ތަފާތުވެފައިވާއިރު، ޖީއެސްޓީއާއި ޓީޖީއެސްޓީ ބޮޑުކުރުމަށްޓަކައި ސަރުކާރުން ހުށަހެޅި ގޮތަށް ބިލު ފާސްކުރަން އެމްޑީޕީން ވަނީ ތްރީ ލައިން ވިޕެއް ނެރެފައެވެ.

އަދި ވިޕްލައިނާއި އެއްގޮތަށް އަމަލު ނުކުރާ މެމްބަރުންނާއި ދޭތެރޭގައި ފިޔަވަޅު އަޅާނެކަމަށް ޕީޖީ ގުރޫޕުގެ ލީޑަރޝިޕުން ވަނީ އިންޒާރުދެއްވާފައެވެ.