އެފްއޭއެމް ހައުސް މިދިޔަ މަސްތަކުގެ ތެރޭގައި ގިނަ ބަޔަކު ބޭނުންކޮށްފައިވާ ކަމަށާއި، އެ ހުރިހާ ބިލިތަކަށް ވާ ފައިސާގެ އަދަދަށް އެ އިދާރާއިން އެކަނި ޒިންމާ ނަގަން ނުޖެހޭނެ ކަމަށް އެފްއޭއެމުން ބުނެފިއެވެ.

6.5 މިލިއަން ރުފިޔާ ނުދައްކާ އޮތް ކަމަށް ބުނެ ސްޓެލްކޯއިން ވަނީ އެފްއޭއެމް ހައުސްގެ ކަރަންޓު ކަނޑާލާފައެވެ. ސްޓެލްކޯއިން ބުނީ އެކުންފުންޏަށް ނުދައްކާ ހުރި ފައިސާ ދެއްކުމަށް އެފްއޭއެމަށް އެކި ފަހަރު މަތިން އަންގާފައިވާ ކަމަށެވެ.

ސްޓެލްކޯއިން ބުނީ 2019 ވަނަ އަހަރުގެ ސެޕްޓެމްބަރު މަހުން ފެށިގެން މިދިޔަ ސެޕްޓެމްބަރު މަހާ ހަމައަށް އެފްއޭއެމުން ކަރަންޓް ބިލް ދައްކާފައި ނުވާ ކަމަށެވެ. 

Advertisement

އެކަމާ ގުޅިގެން އެފްއޭއެމްއިން މިއަދު ނެރުނު ބަޔާނުގައި ބުނީ އެފްއޭއެމްގެ އިދާރާ، އެފްއޭއެމް ހައުސް މިދިޔަ މަސްތަކުގެ ތެރޭގައި ގިނަ ބަޔަކު ބޭނުންކޮށްފައިވާ ކަމަށެވެ. އެގޮތުން ކޮވިޑްގެ އާލަމީވަބާގެ ތެރޭގައި 2020 ވަނަ އަހަރު ކޮވިޑް ފެސިލިޓީއެއްގެ ގޮތުގައި ވަނީ މި އިމާރާތް ބޭނުންކޮށްފައިވާ ކަމަށް އެފްއޭއެމުން ނެރުނު ބަޔާނުގައި ބުނެފައި ވެއެވެ.

އަދި އޭގެފަހުން ސްކައުޓް އެސޯސިއޭޝަންގެ އިދާރާ ހިންގުމަށް މިހާރުވެސް އިމާރާތް ބޭނުންކުރަމުންދާ ކަމަށް ވަނީ ބުނެފައެވެ. އެހެންކަމުން އެ ހުރިހާ ބިލްތަކަށް ވާ ފައިސާގެ އަދަދަށް އެ އިދާރާއިން އެކަނި ޒިންމާ ނަގަން ނުޖެހޭނެ ކަމަށް އެފްއޭއެމުން ވަނީ ބުނެފައެވެ.

އެފްއޭއެމްއިން ބުނީ އެކިއެކި ކަންކަމުގައި އިދާރާ ބޭނުންކުރާ ފަރާތްތަކަށް ނުބަލައި، މިއަދު ސްޓެލްކޯއިން އެ އިދާރާއާ ދޭތެރޭ އެޅި ފިޔަވަޅަކީ ޒިންމާދާރުކަން ކުޑަ އަމަލެއް ކަމަށެވެ.

އޭގެ އިތުރުން ސްޓެލްކޯގެ އިހުމާލުން 2019 ވަނަ އަހަރާ ހަމަޔަށް 1.9 މިލިއަން ރުފިޔާ ކަރަންޓުގެ ހަރަދަށް ބިލް ކޮށްފައިވަނީ ނުބައިކޮށް ކަމަށް އެއްބަސްވެފައިވީ ނަމަވެސް، މިއަދާ ހަމަޔަށްވެސް އެ މައްސަލަ ހައްލުކުރަން ސްޓެލްކޯއިން މަސައްކަތް ނުކުރާ ކަމަށް އެފްއޭއެމުން ބުނެއެވެ.