ވަކި ސިޔާސީ ޕާޓީއަކަށް ނިސްބަތްވާތީ ޚިދުމަތް ދިނުމުގައި ވަކި އުސޫލެއް ނުގެންގުޅުއްވާ ކަމަށް ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.

އަހުމަދު ޝަރީފް މިހެން ވިދާޅުވީ، މަގުބައްތި މަރާމާތުކޮށް ބެލެހެއްޓުމަށް ސްޓެލްކޯއިން ކ އަދި ވ އަތޮޅުގެ ރަށު ކައުންސިލްތަކާއެކު ފަހުނާމާގައި ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުންނެވެ.

މި ރަސްމިއްޔާތުގައި ވާހަކަ ދައްކަވަމުން ޝަރީފް ވިދާޅުވީ، ސްޓެލްކޯއިން ޚިދުމަތް ދިނުމުގައި، އަދި އަސާސީ ހިދުމަތް ދިނުމުގައި އެއްވެސް ވަަރަކަށް ސިޔާސީ ކުލައެއް ނުޖައްސާނެކަމުގެ ޔަގީންކަން އަރުވާ ކަމަށެވެ.

ޝަރީފް ވަނީ ސްޓެލްކޯއިން މާލޭގައި ހުންނަ ޕްލާންޓަކަށް ލޮނު ގެނެސް ކޫލިންގ ސިސްޓަމަށް ފިނިކުރާ ހޮޅިއެއް ފަޅައިގެން ދިއުމުން ސިޓީ ކައުންސިލުން ކަންކަންކުރި ގޮތާއިމެދު ކަންބޮޑުވުން ފާޅުކުރަށްވާފައެވެ. އޭނާ ވިދާޅުވީ، ހުރިހާ ރައްޔިތުންނަށް ހިދުމަތް ފޯރުކޮށްދޭނީ އެއްވަރަކަމަށާއި، ތަފާތު ކުރުމެއް ނޯންނާނެ ކަމަށެވެ.

އެ މައްސަލައިގައި ސިޔާސީ ގޮތުން ތަޅާފޮޅާކަށް ބޭނުމެއް ނުވާ ކަމަށާއި، ސްޓެލްކޯއިން އެމައްސަލަ އެއްކޮށް ހައްލުކުރުމުގެ މަސައްކަތް މާދަމާ ނިންމާލެވޭނެ ކަމަށެވެ.