ޗާގޯސް މައްސަލައިގައި މި ސަރުކާރުން ސްޓޭންޑް ބަދަލުކޮށް މޮރިޝަސްކޮޅަށް ޖެހުނީ ސަރުކާރުގެ ޑީލްއެއް ހަދައިގެންކަމަށް ކުރީގެ ބަންޑާނަ ނައިބު، އަދި ރާއްޖޭގެ ސަރަހައްދު ކަނޑައެޅުމުގެ މަސައްކަތުގައި އިސްކޮށް އުޅުއްވި ޑރ މުހައްމަދު މުނައްވަރު ތުހުމަތުކުރައްވައިފިއެވެ. 

އެ މައްސަލައާއި ގުޅިގެން ޑރ މުނައްވަރު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވިދާޅުވީ، މޮރިޝަސްއަށް ބޮޑު ސަރަހައްދެއް ލިބޭގޮތަށް، ސަރުކާރުގެ ސްޓޭންޑް ބަދަލުކުރުމަށްފަހު އެކަން ދިފާއުކުރުމަށް އެއީ އިންޓަރނޭޝަނަލް ލޯގައި އޮތްކަމަށް ބުނި ނަމަވެސް އެއީ މުޅިން ތެދު ވާހަކައެއް ނޫންކަމަށެވެ. 

ގައުމުތަކުގެ ސަރަހައްދުތައް ކަނޑައަޅާއިރު، ފުށޫ އަރާ ސަރަހައްދެއް އޮތްކަމުގައ ވާނަމަ ބައި ކުރުމަކީ އޮންނަ ކަމެއް ނަމަވެސް އެއީ އެކަމުގައި އޮންނަ ހަމައެކަނި އުސޫލު ނޫންކަމަށް ޑރ މުނައްވަރު ވިދާޅުވިއެވެ. އެގޮތުން ކަނޑުގެ ސަރަހައްދުން މަންފާ ހާސިލްކުރަނީ ކޮންބައެއްކަމަށްވެސް ރިއާޔަތް ކުރައްވާކަމަށް ޑރ މުނައްވަރު ވިދާޅުވިއެވެ. 

Advertisement

އޭގެ އިތުރުން ޑރ މުނައްވަރު ވިދާޅުވީ އިގްތިސާދީ ސަރަހައްދު ކަނޑައަޅާ އިގްތިސާދީ ގޮތުން މަންފާތައް ހޯދަމުންދާ ގައުމުތަކުގެ މެދުގައިކަމަށެވެ. ރާއްޖެއަކީ މސްވެރި ގައުމެއް ނަމަވެސް މޮރިޝަސްއަކީ މަސްވެރި ގައުމެއް ނޫންކަމަށް ޑރ މުވައްވަރު ވިދާޅުވިއެވެ. އަދި މޮރިޝަސްއިން ކުރަމުންދާކަމަކީ އެ ގައުމުގެ ސިޔާދަތު ހިނގާ ސަރަހައްދުން މަސްވެރިކަން ކުރުމަށް އެހެން ގައުމުތަކަށް ހުއްދަ ދިނުންކަންވެސް ފާހަގަކުރެއްވިއެވެ. 

ޗާގޯސް މައްސަލަ މޮރިޝަސް ކޮޅަށް ނިމި، ސަރަހައްދު ބައިކުރަން ޖެހިއްޖެނަމަ ދިވެހިރާއްޖޭގެ ސަރަހައްދާއި ކައިރި ހިސާބުތަކުން ލޭނުއެޅުމުގެ ހުއްދަ މޮރިޝަސްއިން އެހެން ގައުމުތަކަށް ދޭނެ ކަމަށާއި، އެހިސާބުން އިޔާދަ ނުކުރެވޭ ގެއްލުންތަކެއް މިކަމުން ލިިގެންދާނެކަމަށް ޑރ މުނައްވަރު ވިދާޅުވިއެވެ. 

އެކަންކަން ފާހަގަކުރައްވާ ޑރ މުވައްވަރު ވިދާޅުވީ މޮރިޝަސް މައްސަައިގައި މިހާ ބޮޑު ގެއްލުމެއް ލިބޭ ގޮތަށް ދައުލަތުގެ ސްޓޭންޑް ބަދަލުކުރީ ޑީލް ހަދައިގެންކަމަށް ބެލެވޭކަމަށެވެ. ޑީލް ހެދީ ސީދާ ކޮން ގައުމަކާއި ކަން ނުދެންނެވި ނަމަވެސް މޮރިޝައަކީ އިންޑިއާއިން ކޮންޓްރޯލު ކުރާ ގައުމެއްކަން އެންމެންނަށްވެސް އެނގޭކަމަށް ޑރ މުނައްވަރު ވިދާޅުވިއެވެ. 

ޑރ މުނައްވަރު ވިދާޅުވީ ޗާގޯސްގެ ސިޔާދަތު މޮރިޝަސްއަށް ދޭން ޖެހޭކަމަށް ބުނެ ދައުލަތުން ވަކާލާތު ކުރުމަކީ ދައުލަތަށް ބޮޑު ގެއްލުމެއް ވާނެކަމެއްކަމަށެވެ. އަދި އެފަދަ ގެއްލުމެއް ދޭން ބޭނުންނުވާނަމަ ސަރުކާރުގެ ޒިންމާދާރު މަގާމުތަކުގައި ތިއްބެވި ފަރާތްތައް އިސްތިއުފާދެއްވުމަށްފަހު ގެއަށް ވަޑައިގަންނަވަން ޖެހޭކަމަށް ޑރ މުނައްވަރު ވަނީ ތަކުރާރުކޮށް ވިދާޅުވެފައެވެ.