ރާއްޖެ އާއި މޮރިޝަސްގެ ބޯޑަރުގެ މައްސަލާގައި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމާ ގޮތަކުން ރާއްޖޭގެ އިގްތިސާދީ ސަރަހައްދެއް ނުގެއްލޭނެ ކަމަށް މި މައްސަލާގައި ރާއްޖޭގެ ފަރާތުން މަސައްކަތްކުރައްވާ ގާނޫނީ ޓީމްގެ ވެރިޔާ ޕްރޮފެސަރު ޕަޔަމް އަޚަވަން ވިދާޅުވެއްޖެ އެވެ.
ޗާގޯސް މައްސަލައާއި ގުޅިގެން ރޭ ރައީސް އޮފީހުގައި ބޭއްވި ނޫސްވެރިންގެ ބައްދަވުމުގައި ވާހަކަ ދައަކަވަމުން ޕްރޮފެސަރު ޕަޔަމް އަޚަވަން ވިދާޅުވީ، ޗާގޯސް މައްސަލަ ކޮންމެ ގޮތަކަށް ނިންމިޔަސް ރާއްޖޭގެ އިގްތިސާދީ އިމުގެ ބައެއް ނުގެއްލޭނެ ކަމަށާއި، ކޮންމެ ގައުމެއްގެ ވެސް އިގްތިސާދީ ހާއްސަ ސަރަހައްދު ކަމުގައި ކަނޑައަޅާފައި އޮންނަ 200 މޭލު އެއްކޮށް އެ ގައުމަކަށް ލިބެނީ އެހެން ގައުމެއްގެ އިމާ ފުށުނާރާ ގޮތަށް އޮތުމުން ކަމަށް ވިދާޅުވިއެވެ. އެގޮތުން މިސާލެއްގެ ގޮތުން ސްރީ ލަންކާ އާއި އިންޑިއާ އަށް ބައެއް ދޭންޖެހިފައި އޮތުން ފާހަގަކުރެއްވިއެވެ.
"ހަތަރުހާހެއްހާ ކިލޯމީޓަރުގެ މައްސަލަ މިއުޅެނީ. މޮރިޝަސްއިން ހުށަހަޅަނީ އިން ވަކިކުރަން ފަށާ ހިސާބަކީ ތިލަ ދިޔަވަރުގައި ފެންނަން އޮތް ބްލެންހެމް ރީފްކަމަށް. އެކަމާ ރާއްޖެއިން ދެކޮޅު ހަދާ"
ގާނޫނީ ޓީމްގެ ވެރިޔާ ޕްރޮފެސަރު ޕަޔަމް އަޚަވަން
ޕަޔަމް ވިދާޅުވިގޮތުގައި، އިމުގެ މައްސަލަ ހައްލުކުރަން ޖެހެނީ މޮރިޝަސްއިން ހުށަހެޅި މައްސަލާގައި އައިސީޖޭގެ ނިންމުމަށް ބިނާކޮށް އިން ކަނޑައެޅުމުގައި މޮރިޝަސް އާއި ރާއްޖެއާ ދެމެދު ހިޔާލު ތަފާތުވެ އެ މަސައްކަތް ކުރަމުން އަންނަތާ ދެ އަހަރު ވެއްޖެކަމަށެވެ. އެގޮތުން އޭނާ ވަނީ ރާއްޖޭގެ ކޭސް ވަރަށް ވަރުގަދަ ކަމަށް ގަބޫލުކުރައްވާ ކަމަށާއި ރާއްޖޭން ޓްރައިބިއުނަލްގައި ވަކާލާތުކުރަނީ ވަރަށް ރަނގަޅަށް ކަމަށް ވިދާޅުވެފައެވެ.
އަޚަވަންގެ ވާހަކައިގައި މިއީ ވަކި ބަޔަކަށް މޮޅު ނުވަތަ ދެރަ ލިބޭފަދަ މައްސަލައެއް ނޫންކަމަށް ވިދާޅުވިއެވެ. އަދި މީގައި ދެކޮޅުންވެސް ބޭނުންވާ ކަންކަން ހުށަހަޅާ ދެބައިމީހުންވެސް ކަންތައްތަކެއްގައި ދޫ ދޭން ޖެހޭކަމަށް ވިދާޅުވިއެވެ.
ޕްރޮފެސަރު ވިދާޅުވީ ސުވާލަކީ ކޭސް ކާމިޔާބުވުމާއި ނުވުން ނޫން ކަމަށާއި ސުވާުލު އޮތީ މައްސަލަ އުފެދިފައިވާ ސަރަހައްދު ބަހާނެ އެންމެ ރަނގަޅު ގޮތަކީ ކޮބައިތޯ ކަނޑައެޅުމާ މެދުގައި ކަމަށެވެ.
Advertisement
This content is created and paid for by advertisers and does not involve Voice Journalists
