ޗާގޯސް މައްސަލާގައި ގޮތެއް ނިންމުމުގައި އިންޑިޔާގެ ނުފޫޒެއް ނެތްކަމަށާއި ރާއްޖެއިން އަބަދުވެސް ތާއީދުކުރަނީ އިސްތިއުމާރާއި ދެކޮޅަށްކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ޗާގޯސް މައްސަލައާއި ގުޅިގެން ރޭ ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ ސަރުކާރުގެ ޚާރިޖީ ސިޔާސަތަށް އެއްވެސް ބަދަލެއް އައިސްފައިނުވާ ކަމަށެވެ. 

މިމައްސަލައާއި ގުޅިގެން އިދިކޮޅުގެ ބައެއް މެންބަރުންވެސް ދަނީ ކަންބޮޑުވުން ފާޅުކުރަމުންނެވެ. އަދި މޮރިޝަސްއާއި އެއްކޮޅަށް ވޯޓު ދިނުމުގައި ފޮރުވިފައިވަނީ ކޮން ކަންތައްތަކެއްތޯ ބެލުމަށް އިންކުއަރީއެއް ހެދުމަށްވެސް ގޮވާލައްވާފައެވެ. މިވާހަކަތަކަށް އިޝާރާތްކުރައްވައި މިއުވާން ވިދާޅުވީ މިއީ ޚާރިޖީ ސިޔާސަތެއް ބަދަލެއް އައިސްފައިވާ ނިންމުމެއް ނޫންކަމަށެވެ. 

Advertisement

އެހެން ނަމަވެސް މި މައްސަލައާއި ގުޅިގެން ރާއްޖެއިން މޮރިޝަސްއާއި އެއްކޮޅަށް ވޯޓުދިނުމަކީ ރާއްޖެއިން މޮރިޝަސްއާ ދެކޮޅަށް ޓްރައިބިއުނަލުގައި ވަކާލާތު ކުރަމުން ގެންދާ މައްސަލައިގެ ސްޓޭންޑަށް ބަދަލެއް އަންނާނެ ކަމެއް ނޫންކަމަށް ސަރުކާރުން ފާހަގަކުރެއެވެ.

މޮރިޝަސްއާއި އެއްކޮޅަށް މިމައްސަލާގައި ވޯޓު ދިނުމަށް ނިންމެވި ސަބަބަކީ ރާއްޖެއިން އަމަލުކުރަމުން އަންނަ އިސްތިއުމާރާއި ދެކޮޅު ޚާރިޖީ ސިޔާސަތު ދެމެހެއްޓުންކަމަށް ސަރުކާރަށް ތާއީދުކުރައްވާ އެމްޑީޕީ މެމްބަރުން ވިދާޅުވެއެވެ.