މަސްތުވާތަކެތީގެ ވިޔަފާރިކުރާ އިސް މީހެއް ކަމަށް ފުލުހުން ބުނާ ގދ. ހޯޑެއްދޫ، އަލޯރާ، އަރުޝަދު ޚާލިދު އިއްޔެ ހައްޔަރު ކުރުމަށްފަހު މިއަދު ދޫކޮށްލައިފިއެވެ. 

މި މައްސަލަ އާއި ގުޅިގެން މައުލޫމާތު ދެމުން ފުލުހުން މިއަދު ބުނީ، އަރުޝަދު އިއްޔެ ފުލުހުންގެ ބެލުމުގެ ދަށަށް ގެނެވުނީ ކޯޓު އަމުރެއްގެ ދަށުން ކަމަށެވެ. އެހެން ނަމަވެސް، އޭނާގެ ބަންދު ދެމެހެއްޓޭ ވަރަށް ހެއްކާއި ގަރީނާ ފުލުހުންނަށް ލިބިފައިނުވާތީ މިއަދު ބަންދުން ދޫކޮށްލާފައިވާ ކަމަށެވެ. 

މިދިޔަ އަހަރުގެ ޑިސެމްބަރު 12 ވަނަ ދުވަހު ފުލުހުން އަތުލައިގަތް 119 ކިލޯގެ މަސްތުވާތަކެތި ރާއްޖެ އެތެރެ ކުރުމަށް އެންމެ އިސްކޮށް މަސައްކަތް ކުރި މީހަކީ އަރުޝަދެވެ. 

Advertisement

މީގެ އިތުރުން 9 ކިލޯގެ މަސްތުވާތަކެތީގެ މައްސަލައެއްވެސް އަރުޝަދުގެ މައްޗަށް ވަނީ އުފުލައިފައެވެ. މިމައްސަލާގައި ކުށުގެ ވެށިން ގިނަ ޢަދަދެއްގެ ފައިސާވެސް ފުލުހުންގެ ބެލުމުގެ ދަށަށް ގެނެވިފައިވެއެވެ.

އަރުޝަދު އާއި އިތުރު ބައެއްގެ މައްޗަށް ދައުވާކުރި ނުވަ ކިލޯގެ މަސްތުވާތަކެތީގެ މައްސަލައެއްގައި އޭނާގެ މައްޗަށް ކުށް ސާބިތުނުވާ ކަމަށް މިދިޔަ އަހަރު ކްރިމިނަލް ކޯޓުން ކުރި ހުކުމް ދައުލަތުން ވަނީ ހައި ކޯޓުގައި އިސްތިއުނާފު ކޮށްފައެވެ.

އެ މައްސަލަ ހައިކޯޓުގައި އިސްތިއުނާފުކޮށްފައިވަނިކޮށް އަރުޝަދުވަނީ ރާއްޖެ ދޫކޮށް ގޮސްފައެވެ. ހައިކޯޓުންވަނީ އަރުޝަދު ހައްޔަރުކޮށްގެން ޝަރީޢަތަށް ޙާޟިރުކުރުމަށް 7 ޖޫން 2022 ވަނަ ދުވަހު އަމުރުކޮށްފައެވެ.

އެ އަމުރު ނެރެފައިވަނިކޮށް ދުބާއީން ޑިޕޯޓުކޮށްލުމުން ލަންކާއަށް އައުމަށްފަހު، އަނބުރާ ރާއްޖެއަށް އައުމުން ފުލުހުންވަނީ، މި މަހުގެ 10 ވަނަ ދުވަހުގައި އޭނާ ހައްޔަރުކޮށްފައެވެ. އަރުޝަދު ބަންދުކުރުމުން، 12 އޮކްޓޯބަރު ވަނަ ދުވަހުގެ ރޭ 7:45 އަށް، އޭނާ ބަންދުގައި ބަހައްޓައިގެން ކޯޓަށް ޙާޟިރުކުރަން ހައިކޯޓުން ފުލުހުންގެ މައްޗަށް އަމުރުކުރިއެވެ.

އެހެންނަމަވެސް، އެރޭ 7:08 ގައި ފުލުހުންވަނީ އަރުޝަދު ބަންދުން ދޫކޮށްލާފައެވެ. އޭނާ ބަންދުން ދޫކޮށްފައިވާކަން އެނގުނީ އަރުޝަދުގެ ފަރާތުން އޭނާ ބަންދުން ދޫކުރި ލިޔުން ހައިކޯޓާ ހިއްސާކުރުމުންނެވެ. ފުލުހުން އޭނާ ދޫކޮށްލާފައިވާތީ އެ ކޯޓުން ނިންމީ އޭނާގެ ބަންދާ މެދު އިތުރަށް ގޮތެއް ނިންމެން ނެތް ކަމަށެވެ.

އެކަމަކު، އަރުޝަދު އަމަލުކުރާ ގޮތެއްގެ ސަބަބުން އޭނާ ބަންދުކުރަން ދައުލަތުން ބޭނުންވެއްޖެ ނަމަ، އެ ފުރުސަތު އޮންނާނެ ކަމަށް ހައި ކޯޓުގެ ނިންމުމުގައިވެ އެވެ. އަދި އަރުޝަދުގެ ޕާސްޕޯޓާއި އޭނާއަށް ރާއްޖެއިން ބޭރަށް ދަތުރުކުރެވޭނެ އިތުރު ލިޔުމެއް އޮތްނަމަ އެ ލިޔުމެއްވެސް ހިފަހެއްޓުމާއެކު، މާލެއިން ބޭރަށް އެއްވެސް ބޭނުމެއްގައި ދާނަމަ، އެކަން ކޯޓަށް އަންގައި ލިޔުމުން ހުއްދަ ހޯދުމަށް ހައިކޯޓުން އަމުރުކޮށްފައިވެއެވެ.