ސަރުކާރު ހިންގާ މައިޕާޓީ އެމްޑީޕީ މިހާރު އޮތީ ރައްޔިތުންގެ ކުރިމަތީ ބަރަހަނާވެފައިކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ އެމްޑީޕީއަށް ތާއީދުކުރަމުންދިޔަ ގިނަ ބަޔަކު އެ ޕާޓީ ދޫކޮށް، ޕީޕީއެމްއާއި ގުޅެން މެދުވެރިވާ ސަބަބުތަކަށް އަލިއަޅުވާލައްވާ މިލަދޫގައި ބޭއްވި ޖަލްސާއެއްގައި ވާހަކަދައްކަވަމުންނެވެ.
އެމަނިކުފާނު ވިދާޅުވީ ކުރީގެ ރައީސް މައުމޫނު އަބްދުލްގައްޔޫމުގެ ދިގު 30 އަހަރުގެ ވެރިކަން ބަދަލުކޮށް ރައްޔިތުންނަށް ނުލިބި ހުރި އެތައް ހައްގުތަކެއް ހޯދާދިނުމަށް އެމްޑީޕީ ވުޖޫދައް ގެނެސް ކުރި މަސައްކަތަށް ރާއްޖޭގެ އެކި ކަންކޮޅުން ތާއީދުކޮށްފައިވާކަމަށެވެ. ރައްޔިތުންގެ ހައްގުގައި މަސައްކަތް ކުރުމުގެ ފުރުސަތުވެސް އެމީހުންނަށް ދީފައިވާކަމަށެވެ.
އެހެން ނަމަވެސް ރައްޔިތުންނަށް ހައްގުތައް ހޯދާދީ ސިޔާސަތުތައް ތަންފީޒުކުރުމަށް އެމްޑީޕީއަށް ފުރުސަތު ދިނުމުން، އެ ސިޔާސަތުތައް ތަންފީޒުކުރުމަށް އެމްޑީޕީ ނުކުޅެދިފައިވާކަމަށް ރައީސް ޔާމީން ވިދާޅުވިއެވެ.
އިދިކޮޅުގައި ތިއްބަވައިގެން މިއަދު ޕީޕީއެމްއިން ކުރާ މަސައްކަތަކީ ސަރުކާރު ޖަވާބުދާރީ ކުރުމުގެ މަސައްކަތްކަމަށާއި އަދި އެކަން ކުރަނީ ސުލްހަވެރިކަމާއެކު އަޑުއުފުލުލައިގެންކަމަށް ރައީސް ޔާމީން ވިދާޅުވިއެވެ.
އެހެން ނަމަވެސް ޑިމޮކްރަސީ ރާއްޖޭގައި އޮންނަން ޖެހޭކަމަށާއި، ޚިޔާލުފާޅުކުރުމާއި އެއްވެ އުޅުމުގެ ހައްގު ރައްޔިތުންނަށް އޮންނަން ޖެހޭކަމަށް އެންމެ ހަރުއަޑުން ވަކާލާތު ކުރި ފަރާތްތަކަށް އެކަން ކަށަވަރުކޮށްދިނުމަށް ފުރުސަތު ލިބުމުން އަމަލުކުރަމުންދަނީ ދިމާ އިދިކޮޅަށްކަމަށް އެމަނިކުފާނު ވިދާޅުވިއެވެ.
އިދިކޮޅު ގެ މުޒާހަރާއަށް ނިކުންނަ ފަރާތްތަކަށް ފުލުހުން މެދުވެރިކޮށް އެތައް އަނިޔާއެއްދީ ރައްޔިތުންނަށް ގާނޫނު އަސާސީއިން ލިބިދޭ ޚިޔާލުފާޅުކުރުމުގެ ހައްގަށް ހުރަސް އަޅަމުންދާކަން ރައީސް ޔާމީންގެ ވާހަކަފުޅުގައި ފާހަގަކުރެއްވިއެވެ.
އެކަން ފާހަގަކުރައްވާ ރައީސް ޔާމީން ވިދާޅުވީ، އެމްޑީޕީއިން ދެއްކި ވާހަކަތަކާއި އަމަލާއި ދިމާނުވާތީ، އެ ޕާޓީ މިއަދު ރައްޔިތުން ކުރިމަތީ ފަޟީހަތްވެފައިވާކަމަށެވެ. އަދި އެ ޕާޓީ މިހާރު އޮތީ ރައްޔިތުންގެ ކުރިމަތީ ބަރަހަނާވެފައި ކަމަށެވެ.
Advertisement
This content is created and paid for by advertisers and does not involve Voice Journalists
