ފޯޅަވަހީގެ މައްސަލާގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހައްދަވަނީ ތެދު ކަމަށާ، އެކަމަށް ހެކިވެވަޑައިގަންނަވާ ކަމަށް ހޯމް މިނިސްޓަރ އަދި އަދާލަތުޕާޓީގެ ރައީސް އިމްރާން ވިދާޅުވެއްޖެއެވެ.
ޢިމްރާން މިފަދައިން ވިދާޅުވެފައި ވަނީ ރާއްޖެ އިސްލާމް ވީ ދުވަހާއި ގުޅިގެން ރޭ ބޭއްވި ޖަލްސާގައި ވާހަކަ ދައްކަވަމުން، ފޯޅަވަހީގެ މައްސަލައަށް އަލި އަޅުވާލައްވައި ރައީސް ޞާލިހު ދެއްކެވި ވާހަކަފުޅާއި ގުޅިގެން ކުރެއްވި ޓްވީޓެއްގައެވެ.
އެގޮތުން ޢިމްރާން ވިދާޅުވީ، ބަޔަކު ކިތަންމެ ނުރުހުނަސް އިމުގެ މައްސަލާގައި ދޫ ނުދެއްވާނެ ކަމަށް ވިދާޅުވެ ރައީސް ޞާލިހު ދައްކަވަނީ ތެދުފުޅެއް ކަމަށް އޭނާ ހެކިވެވަޑައިގަންނަވާ ކަމަށެވެ.
"މިކަން ހިނގަމުންދާގޮތް އަޅުގަނޑުމެންނަށް ވަރަށް ރަނގަޅަށް އެނގޭ" ޢިމްރާން ވިދާޅުވިއެވެ.
ރޭގެ ޖަލްސާގައި، ޗާގޯސް މައްސަލައިގެ ބައެއް ތާރީޚްތައް ސާފުކޮށްދެއްވަމުން ރައީސުލްޖުމްހޫރިއްޔާ ވަނީ ދިވެހިރާއްޖޭގެ ކަނޑުގެ ސަރަޙައްދާއި ޗާގޯސްގެ ކަނޑުގެ ސަރަޙައްދު ކަނޑައެޅުމުގައި އޮތް، ފުށުއަރާ ސަރަޙައްދުގެ މައްސަލަ އަކީ ޙައްލެއް ނުހޯދި އޮންނަތާ ގިނަ އަހަރުތަކެއް ވެފައިވާ މައްސަލައެއްކަން ފާހަގަކުރައްވާފައެވެ.
އަދި އެ މައްސަލައިގައި ވެސް އެނޫން މައްސަލަ އެއްގައި ވެސް ރާއްޖެއަށް ގެއްލުންވާފަދަ އެއްވެސް ކަމެއް ނުކުރާނެ ކަމަށްވެސް އެމަނިކުފާނު ވިދާޅުވިއެވެ.
"ޗާގޮސް މައްސަލައިގައި ވެސް އަދި ޚާރިޖީ ދާއިރާއާއި ގުޅޭ އެހެންކަމެއްގައި ވެސް ރާއްޖޭގެ ސިޔާދަތީ މިނިވަންކަމަށް ގެއްލުމެއް ލިބޭފަދަ ނިންމުމެއް މި ސަރުކާރަކުން މިހާތަަނަށް ވެސް ނިއްމާފައެއް ނޯއްނާނެ، އަދި ދެން ވެސް އެފަދަ ގެއްލުމަކަށް މި ސަރުކާރުން ޖާގައެއް ނުދޭނަން،" ރައީސް ސާލިޙު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
