މިދިޔަ އަންގާރަ ދުވަހު ފުލުހުން ހިންގި އޮޕަރޭޝަނެއްގެ ތެރެއިން ގދ.ހޯޑެއްދޫއިން ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައިވަނިކޮށް ނިޔާވި، ރަޝީދުގެ ހަށިގަނޑު ޢާއިލާއާއި ހަވާލު ކުރުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ގޮވާލައިފިއެވެ. 

ރަޝީދުގެ ނިޔާވިތާ ދެދުވަސް ވީއިރުވެސް ވާނުވާއެއް ނާންގާ އޭނާގެ މަސްގަނޑު މޮޗަރީއަށް ލާފައި އޮތުމާއި ގުޅިގެން އެކަމާއި ކަންބޮޑުވުން ފާޅުކޮށް، ޕޯސްޓްމޯޓަމް ނުހަދައި، އޭނާގެ ހަށިގަނޑު ޢާއިލާ އާއި ހަވާލުކުރުމަށް ރަޝީދުގެ މަންމަ އާއި ޢާއިލާއިން ތަކުރާރުކޮށް ފުލުހުންގެ ކިބައިން އަންނަނީ އެދެމުންނެވެ. އެހެންނަމަވެސް، މިހާތަނަށްވެސް ރަޝީދުގެ ހަށިގަނޑު އޮތީ ގަލޮޅު މޮޗަރީގައެެވެ.  

އެކަމާއި ގުޅިގެން ޓޮމް ކުރެއްވި ޓުވީޓެއްގައި ވިދާޅުވީ، މައްޔިތާގެ ހަށިގަނޑަކީ އާއިލާގެ އެއްޗެއް ކަމަށެވެ. 

"އެއީ ދައުލަތުގެ އެއްޗެއްނޫން. ޝެެއިޚް އިމްރާނަކަށް ނުވަތަ ސީޕީ ހަމީދަކަށް އާއިލާގެ ނުރުހުމުގައި ހަށިގަނޑުފަޅާ، ގުނަވަންތަށް ނަގާ ނުހެދޭނެ. ކަށުކަމާކެމީގެ ކަންތައްތަކަށް މައްޔިތާގެ ހަށިގަނޑު ހަވާލުކުރުމަށް ގޮވާލަން." ޓޮމް ވިދާޅުވިއެވެ. 

ރަޝީދުގެ ހަށިގަނޑު ޢާއިލާއައި ހަވާލު ނުކޮށް، ޢާއިލާގެ ނުގަބޫލުގައި ޕޯސްޓްމޯޓަމް ހަދަން ސަރުކާރުން މަސައްކަތް ކުރަމުންދާތީ ކަންބޮޑުވުންފާޅުކޮށް އޭނާގެ އާއިލާއިން މިއަދު ބޭއްވި ނޫސްވެރިންގެ ބައްދަލުވުމުގައި ރަޝީދު މަންމަ ވަނީ، ރަޝީދުގެ މަރުގެ މައްސަލަ ބަލަން ބޭނުން ނުވާ ކަމަށާ، ބޭނުންވަނީ އޭނާގެ މަސްގަނޑު ވޭހާވެސް އަވަހަށް ވަޅުލާން ކަމަށް ބުނެފައެވެ. 

"ރަށުގައި ހުއްޓާވެސް ބުނި ޕޯސްޓްމޯޓަމް ހަދާ ވާހަކަ. އަޅުގަނޑު ބުނިން ބޭނުމެއް ނޫނެ އަޅުގަނޑުމެންނެއް ދަރިފުޅަށް ދެން އިތުރު އެއްވެސް އަނިޔާއެއް ދޭކަށް. ދެން އަޅުގަނޑުމެން ބޭނުމީ އޭނާ ކަފުން ކޮށްފައި ވަޅުލާށޭ. އެކަމަކު ހަމަ މިތާ ބައިތިއްބައިގެން. މިތަނަށްވެސް (ރަޝީދުގެ ހަށިގަނޑު އޮތް ތަން) ވަނަ ނުދޭ. ކޮން މައެއްގެ ހިތައްތަ، މަސްގަނޑު މިތާ ބާއްވާފައި ގޮސް ގޭގައި ނިދަން އޮވެވޭނީ. އެމީހުންނަށްވެސް އެނގޭނީ އެމީހުންނަށް ޖެހުނީމާ ވާނެގޮތް." ރަޝީދުގެ މަންމަ ބުންޏެވެ.  

ޢާއިލާއިން އެފަދައިން އެދުނު ނަމަވެސް، އެ މައްސަލާގައި އިތުރު މައުލޫމާތު ދިނުމަށް އުޒުރުވެރިވެ ފުލުހުން މިއަދު ބުނީ އެ މައްސަލައިގެ ޕްރައިމަރިލީ އިންވެސްޓިގޭޓިންގ އެޖެންސީ އަކީ މިހާރު އެންއައިސީ ކަމަށެވެ. އަދި އެ މައްސަލަ އާއި ގުޅޭ ގޮތުން ހިންގާ މުއާމަލާތްތަކާއި މައުލޫމާތު ހާމަކުރާނީ އެންއައިސީން ކަމަށާ އެކަން އެގޮތަށް ކުރަން ފުލުހުންނާއި އެ ކޮމިޝަނުން އެއްބަސްވެފައިވާ ކަމަށް ފުލުހުން ބުނެފައިވެ އެވެ. އޭގެ އިތުރަށް އެއްވެސް މައުލޫމާތެއް ފުލުހުން ދީފައެއް ނުވެއެވެ.