ފުލުހުންގެ ބަންދުގައި ހުއްޓާ ނިޔާވި ރަޝީދުގެ ޕޯސްޓްމޯޓަމް ނުހަދައި ހަށިގަނޑު ހަވާލުކުރުމަށް ޢާއިލާއިން އެދެމުން ދަނިކޮށް އޭނާގެ ޕޯސްޓްމޯޓަމް ހަދާނެ ކަމަށް ނޭޝަނަލް އިންޓަގްރިޓީ ކޮމިޝަން (އެންއައިސީ) އިން ވެސް ބުނެފިއެވެ.

ރަޝީދުގެ މަރާއި ގުޅިގެން ފުރަތަމަ ފަހަރަށް އިންޓަގްރިޓީ ކޮމިޝަނުން ނެރުނު ބަޔާނެއްގައި ބުނީ ރަޝީދުގެ މަރުގައި ފުލުހުންގެ އެއްވެސް އިހުމާލެއް އޮތްތޯ ބެލުމަށް އެކޮމިޝަނުން ޖިނާއީ ތަހްގީގެއް ފަށާފައިވާ ކަމަށެވެ.

އެ މައްސަލައިގެ ތަހްގީގު ކުރިއަށް ގެންދަނީ ފުލުހުންނާއި ގުޅިގެން ކަމަށާއި ނަމަވެސް މައްސަލައިގައި ލީޑިން އިންވެސްޓިގޭޓަރެއްގެ ދައުރު އަދާކުރާނީ އިންޓަގްރިޓީ ކޮމިޝަނުން ކަމަށް ބަޔާނުގައި ބުނެފައިވެއެވެ. އަދި  މިތަހްގީގުގައި ފުލުހުންގެ ދައުރަކީ ހަމައެކަނި ކޮމިޝަންގެ ތަހްގީގަށް އެހީތެރިވެދިނުން ކަމަށްވެސް ބުނެފައިވެއެވެ. 

މީގެ އިތުރުން އެ ބަޔާނުގައި ބުނީ، "މިމައްސަލައިގައި އިންސާފަށް ވާސިލްވުމަށް މުހިއްމު ކަމަކަށް ވާތީ ތަހްގީގު ބޭނުމަށް ކަނޑައެޅިފައިވާ އިޖުރާއަތުގެ ދަށުން ރަޝީދުގެ ޕޯސްޓްމޯޓަމް ނިންމާފައިވާ" ކަމަށެވެ.

އެންއައިސީން ރޭ މިފަދައިން ބުނެފައިވާއިރު، ރަޝީދުގެ ހަށިގަނޑު ޢާއިލާއައި ހަވާލު ނުކޮށް، ޢާއިލާގެ ނުގަބޫލުގައި ޕޯސްޓްމޯޓަމް ހަދަން ސަރުކާރުން މަސައްކަތް ކުރަމުންދާތީ ކަންބޮޑުވުންފާޅުކޮށް އޭނާގެ އާއިލާއިން އިއްޔެ ބޭއްވި ނޫސްވެރިންގެ ބައްދަލުވުމުގައި ރަޝީދު މަންމަ ވަނީ، ރަޝީދުގެ މަރުގެ މައްސަލަ ބަލަން ބޭނުން ނުވާ ކަމަށާ، ބޭނުންވަނީ އޭނާގެ މަސްގަނޑު ވޭހާވެސް އަވަހަށް ވަޅުލާން ކަމަށް ބުނެފައެވެ. 

"ރަށުގައި ހުއްޓާވެސް ބުނި ޕޯސްޓްމޯޓަމް ހަދާ ވާހަކަ. އަޅުގަނޑު ބުނިން ބޭނުމެއް ނޫނެ އަޅުގަނޑުމެންނެއް ދަރިފުޅަށް ދެން އިތުރު އެއްވެސް އަނިޔާއެއް ދޭކަށް. ދެން އަޅުގަނޑުމެން ބޭނުމީ އޭނާ ކަފުން ކޮށްފައި ވަޅުލާށޭ. އެކަމަކު ހަމަ މިތާ ބައިތިއްބައިގެން. މިތަނަށްވެސް (ރަޝީދުގެ ހަށިގަނޑު އޮތް ތަން) ވަނަ ނުދޭ. ކޮން މައެއްގެ ހިތައްތަ، މަސްގަނޑު މިތާ ބާއްވާފައި ގޮސް ގޭގައި ނިދަން އޮވެވޭނީ. އެމީހުންނަށްވެސް އެނގޭނީ އެމީހުންނަށް ޖެހުނީމާ ވާނެގޮތް." ރަޝީދުގެ މަންމަ ބުންޏެވެ.