މަރުވެފައިވާ މައްޔިތާގެ ޢާއިލާގެ ނުރުހުމުގައި ޕޯސްޓްމޯޓަމް ހެދުމުގެ ބާރު ދިވެހިރާއްޖޭގެ އެއްވެސް ގާނޫނަކުން ދައުލަތަށް ދީފައި ނުވާ ކަމަށް ކުރީގެ ބަންޑާރަ ނާއިބު އަދި ގާނޫނީ ދާއިރާއިން ފުންނާބު އުސް ފަރާތެއް ކަމަށްވާ އާޒިމާ ޝަކޫރު، ވިދާޅުވެއްޖެއެވެ. 

މިދިޔަ އަންގާރަ ދުވަހު ފުލުހުން ހިންގި އޮޕަރޭޝަނެއްގެ ތެރެއިން ގދ.ހޯޑެއްދޫއިން ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައިވަނިކޮށް ނިޔާވި، ރަޝީދުގެ ހަށިގަނޑު ޕޯސްޓްމޯޓަމް ނުހަދައި ޢާއިލާއާއި ހަވާލު ކުރުމަށް ޢާއިލާއިން އެދެމުން ދިޔަނަމަވެސް، އޭނާގެ ޕޯސްޓްމޯޓަމް ހަދާނެ ކަމަށް ފުލުހުން ވަނީ މީގެ ކުރިން ބުނެފައެވެ.

އަދި އެ މައްސަލަ މިހާރު ބަލަމުންދާ ނެޝަނަލް އިންޓެގްރިޓީ ކޮމިޝަން (އެންއައިސީ) އިން ރޭ ނެރުނު ބަޔާނުގައިވެސް ފުލުހުންގެ އެ ނިންމުން ބަދަލު ނުކުރާ ކަމަށާ، އެ ކޮމިޝަނުންވެސް ނިންމާފައިވަނީ ޕޯސްޓްމޯޓަމް ހެދުމަށް ކަމަށް ކަމަށް ވަނީ ބުނެފައެވެ. 

Advertisement

އެހެން ނަމަވެސް އެއީ އެގޮތަށް ނުކުރެވޭނެ ކަމެއް ކަން ހަމާކޮށް އާޒިމާ ފޭސްބުކް ގައި ކުރެއްވި ޕޯސްޓެއްގައި ވިދާޅުވީ، ދިވެހި ރާއްޖޭގެ ގާނޫނު އަސާސީ އަކީ ވަރަށް ސާފުކޮށް އެނގެން އޮތް އެއްޗެއް ކަމަށެވެ. އެގޮތުން ގާނޫނު އަސާސީގައި ވާގޮތުން އެއްވެސް މީހަކު ހިފައި ހައްޔަރުކޮށް 24 ގަޑިއިރަށްވުރެ ގިނަ އިރު ހިފެހެއްޓޭނީ ފަނޑިޔާރެއްގެ ކުރިމައްޗަށް އެމީހަކު ހާޒިރު ކުރުމަށްފަހު އެކަމަށް ކޯޓު އަމުރެއް ހޯދައިގެން ކަމަށެވެ. އަދި އެ މާއްދާއިން މަރުވެފައި އޮތް މީހަކު އިސްތިސްނާ ނުވާ ކަމަށްވެސް އޭނާ ވިދާޅުވިއެވެ. 

މިއާއެކު އާޒިމާ ވިދާޅުވީ، ޖިނާއީ އިޖުރާއަތުގެ ގާނޫނަށް ބަލާ ނަމަވެެސް އެއްވެސް މީހެއްގެ ހަށިގަނޑުން ސާމްޕަލް ނެގޭނީ އޭނާގެ ހުއްދައާއި ލައިގެން ކަމަށެވެ. އަދި އެ ހުކުމް މަރުވެފައި އޮންނަ މައްޔިތާއަށްވެސް ހިނގާނެ ކަމަށާ، އެގޮތަށް އެހެން އޮތީ އަދި މިހާތަނަށް ޕޯސްޓްމޯޓަމް ހެދުމާއި ގުޅޭ ގާނޫނެއް ނެތުމުން ކަމަށްވެސް ވިދާޅުވިއެވެ. އެހެން ކަމުން އެ ހުކުމަށް ބަލާއިރު މައްޔިތާގެ ހަށިގަނޑު ފަޅައި ސާމްޕަލް ނެގޭނީ އޭނާގެ ޝަރުޢީ ބަލަދުވެރިޔާ ނުވަތަ ވާރިސުން ހުއްދަ ދިނުމުން ކަމަށާ އެ ނޫން ގޮތަކަށް، ޕޮލިސް ތަހުގީގަށް ޕޯސްޓްމޯޓަމް ހަދަން ބޭނުން ނަމަ، ކޯޓުގެ އަމުރެއް ހޯދަން ޖެހޭނެކަން ވެސް އާޒިމާ ފާހަގަކުރެއްވިއެވެ. 

އަދި މިހާރު އާއިލާ ނުވަތަ ވާރިސުން ހަށިގަނޑު ހޯދަން ބޭނުން ނަމަ، އާއިލާ އާއި ހަށިގަނޑު ހަވާލުނުކޮށް ބޭއްވޭނީ ހަމައެކަނި ކޯޓު އަމުރެއްގެ ދަށުންނެވެ.