ގާނޫނާއި ޚިލާފު އެއްވެސް ކަމެއް ނުކުރަން ކަމަށާ، އަދި ނުވެސް ކުރާނަން ކަމަށް މާލެސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މުޢިއްޒު މިފަދައިން ވިދާޅުވީ، ރޭ ދިވެހި ޗެނަލުން ގެނެސްދިން "ހަވާސާ" ޕްރޮގްރާމްގައި ނޫމަޑި މައްސަލައިގައި ކުރީގެ ހައުސިން މިނިސްޓަރ އަދި މިހާރު މާލެ ސިޓީގެ މޭޔަރ ޑރ. މުއިއްޒުގެ މައްޗަށް ދޮގު ބަޔާން ދިން ކަމަށް ތުހުމަތުކޮށް ދައުލަތުން އުފުލާފައިވާ ދައުވާއާއި ގުޅިގެން ކުރި ސުވާލަށް ޖަވާބު ދެއްވަމުންނެވެ.
އެގޮތުން މުޢިއްޒު ވިދާޅުވީ އެ މައްސަލަ އަކީ މިވަގުތު ކޯޓުގައި ކުރިއަށްދާ މައްސަލަ އަކަށްވާތީ އެކަމުގެ ތެރެއަށް ވަދެވޭނެ ކަމަށް ގަބޫލު ނުކުރައްވާ ކަމަށެވެ.
"ދެން ޖުމްލަ ގޮތެއްގައި ދަންނަވާ ނަމަ، އަޅުގަނޑެއް އެއްވެސް ތާކު ދޮގެއް ނުހަދަން. އަޅުގަނޑެއް ގާނޫނާއި ޚިލާފް އެއްވެސް ކަމެއް ނުކުރަން. ނުވެސް ކުރާނަން."
މޭޔަރ ޑރ. މުހައްމަދު މުއިއްޒު
ދައުލަތުން ޑރ މުއިއްޒުގެ މައްޗަށް ދޮގު ބަޔާން ދިނުމުގެ ދައުވާ އުފުލާފައި ވަނީ 25 ޖޫން 2019 ދުވަހު ނޫމަޑި ރިސޯޓްސް އެންޑް ރެސިޑެންސަން އޭޖީ ނަމަކަށް ކިޔާ ކުންފުންޏަކުން (ނޫމަޑި) އިން ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަންއަށް ހުށަހަޅާފައިވާ މައްސަލާގައި އެކުންފުނީގެ ހެކިވެރިއަކަށްވެ، ހައުސިންގ ޔުނިޓް މަޝްރޫޢާ ގުޅިގެން ނޫމަޑިއާއެކު ދިވެހި ސަރުކާރުން 2011 ގައި ވެފައިވާ ފޭސް 1 ގެ އެއްބަސްވުމާއި 2013 ގައި ވެފައިވާ ފޭސް 2 ގެ އެއްބަސްވުމުގެ މަސައްކަތް އެކުންފުނިން ޝެޑިއުލްއާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ބުނެ، އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައިނުވާކަމަށް ބުނެ، ދޮގު ބާޔަނެއް ދީފައިވާ ކަމަށް ބުނެއެވެ.
އެ މައްސަލާގައި ދައުލަތުން އުފުލާފައިވާ ދައުވާއާއި ގުޅިގެން މުއިއްޒުގެ ފަރާތުން ކްރިމިނަލް ކޯޓަށް ހުށަހެޅި ހުށަހެޅުންތަކެއް ވަނީ ހުށަހަޅުއްވާފައެވެ.
އެގޮތުން ހުށަހެޅުއްވީ އެ ދައުވާއަކީ ކުރިއަށް ނުގެންދެވޭނެ ދައުވާއެއް ކަމަށް ކަނޑައެޅުމަށެވެ. އެގޮތަށް ކަނޑައަޅުއްވައި ދެއްވުމަށް މުއިއްޒުގެ ފަރާތްޕުޅުން ހުށަހެޅުއްވީ ދައުލަތުން ހުށަހެޅި މައްސަލައިގައި ދައުލަތުން ތުހުމަތު ކުރާ ކުށް މުއިއްޒު ކުރެއްވި ތަނެއް ދައުވާގައި ބުނެފައި ނުވާތީއެވެ. މުއިއްޒުގެ ފަރާތުން ޝަރީޢަތުގެ މަޖިލީހުގައި ވިދާޅުވެފައި ވަނީ އޭނާ ދޮގު ބަޔާން ދިން ކަމަށް ދައުލަތުން ތުހުމަތު ކުރާނަމަ އޭނާ އެ ކުށް ކުރި ތަނެއް ދައުލަތަށް ބުނެދެވެން ޖެހޭނެ ކަމަށެވެ. އެހެން ކަމުން ދައުވާގައި އެކަން ބުނެދެވިފައި ނުވާތީ އެ ދައުވާއަކީ ކުރިއަށް ގެންދެވިދާނެ ދައުވާއެއް ކަމަށް ގަބޫލު ނުކުރައްވާ ކަމަށް މުއިއްޒުގެ ފަރާތްޕުޅުން ވަނީ ފާހަގަ ކޮށްފައެވެ. އެހެންނަމަވެސް މުއިއްޒުގެ ހުށަހެޅުއްވުން ބަލައިނުގަންނަން ކްރިމިނަލް ކޯޓުން ނިންމާފައިވާއިރު އެ ހުށަހެޅުންތައް މިހާރު ވަނީ ހައިކޯޓުގައި އިސްތިއުނާފް ކޮށްފައެވެ.
Advertisement
This content is created and paid for by advertisers and does not involve Voice Journalists
