ފޯޅަވަހީގެ މައްސަލަ އާއި ގުޅިގެން ވެރިކަން ކުރާ މައި ޕާޓީ އެމްޑީޕީ އާއި ވެސް މަޝްވަރާ ނުކުރައްވާ ކަމަށާ، ވީއިރު ސަރުކާރު ހިންގާ ކޯލިޝަންގައި ހިމެނޭ އެމްއާރްއެމްއާއި ކުރާނެތޯ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އަދި އެމްޑީޕީގެ ކުރީގެ ތަރުޖަމާނު އިމްތިޔާޒު ފަހުމީ (އިންތި) ސުވާލުކުރައްވައިފިއެވެ.
ޗާގޯސް މައްސަލައިގައި ބަހުސް ކުރެވެމުންދާތާ ހަފުތާއެއްހާ ދުވަސް ވެފައި ވަނިކޮށް އެމްއާރްއެމް އިން މިއަދު ނެރުނު ބަޔާނެއްގައި ވަނީ، ރާއްޖެއާ ފޯޅަވަހީގެ އިގުތިސާދީ ސަރަހައްދުން ފުށުއަރާ ކަމަށް ބުނާ ބައި ޑީލިމިޓް ކުރުމަށް އެދި މޮރިޝަސް އިން ހުށަހަޅާފައިވާ މައްސަލަ ކުރިއަށް ދަނިކޮށް ރާއްޖެއަކީ ގައުމުތައް އަޅުވެތި ކުރުމާ ދެކޮޅަށް ވޯޓުދޭ ގައުމެއް ނޫން ކަމަށް ދައްކަން އދ. ގެ ޖެނެރަލް އެސެމްބްލީގައި ރާއްޖެއިން މޮރިޝަސްއާ އެއްކޮޅަށް ވޯޓް ދޭން ނިންމުމުން ކަންބޮޑުވާ ކަމަށް ބުނެފައެވެ.
އަދި އެ މައްސަލައިގައި ސަރުކާރުގެ ނިންމެވުން ރައްޔިތުންގެ މަޖިލީހަށް ހުށަހަޅުއްވައި އެކަމުގައި މަޖިލީހުގެ ބަހެއްވެސް ސަރުކާރުން ހޯއްދަވާފައި ނުވާތީ އާއި އަދި މީގެ އިތުރުން އެމައްސަލާގައި ރާއްޖޭގެ ފަރާތުން ބައިނަލްއަގްވާމީ ފަރާތްތަކާއެކު ވަކާލާތު ކުރުމުގައި، ކަމުގެ ފަންނީ މާހިރުން ދިވެހިންގެތެރޭގައި ތިއްބެވިއިރު، އޭގެ ތެރެއިން ގިނަބޭފުޅުންގެލަފައާއި މަޝްވަރާ ހޯއްދަވާފައިނުވާތީ އެމްއާރްއެމްއިން ވަނީ ކަންބޮޑުވުން ފާޅުކޮށްފައެވެ.
އެމްއާރްއެމްގެ އެ ބަޔާނާއި ގުޅިގެން އިންތި ކުރެއްވި ޓުވީޓެއްގައި ވިދާޅުވީ، އެ މައްސަލައިގައި ސަރުކާރުން ގޮތް ނިންމީ މަޖިލީހާއި ވެރިކަންކުރާ މައި ޕާޓީ، އެމްޑީޕީއާ ވެސް މަޝްވަރާނުކޮށް ކަމަށެވެ.
"ދިވެހިން ދޫކޮށްލައްވާފައި ފުރަތަމަ ވެސް އެކަން ހިއްސާކުރެއްވީ މޮރިޝަސްގެ ބޮޑުވަޒީރާ،" އިންތި ވިދާޅުވިއެވެ.
މޮރިޝަސްގެ ބޮޑުވަޒީރާއި މަޝްވަރާ ކުރެއްވި ކަމަށް އިންތި ވިދާޅުވެފައި އެވަނީ ޗާގޮސް މައްސަލައާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީއަށް އިޝާރާތްކުރައްވައެވެ. އެ ސިޓީގައި ރައީސް ޞާލިހު ދެންނެވި ވާހަކަތައް ހާމަކުރެއްވުމަށް ރައީސް އޮފީހުން ވަނީ ދެކޮޅުހަދާފައެވެ.
Advertisement
This content is created and paid for by advertisers and does not involve Voice Journalists
