ޖަލުގައި ތިބި ގައިދީންގެ ތެރެއިން ސްޕެޝަލިސްޓް ޑޮކްޓަރުންނަށާއި ސިއްހީ އެކިއެކި ޓެސްޓްތައް ހަދަން ޖެހިފައި ތިބި މީހުނަށް ފަރުވާ ދިނުމަށް "އޮޕަރޭޝަން ހޭހަން" ގެ ނަމުގައި މޯލްޑިވްސް ކަރެކްޝަނަލް ސާވިސް އިން މިއަދު ޕްރޮގްރާމެއް ފަށައިފި އެވެ.

ކޮމިޝަނަރ އޮފް ޕްރިޒަންސް އަހްމަދު މުހައްމަދުފުޅު ކުރެއްވި ޓްވީޓެއްގައި ވިދާޅުވީ "އޮޕަރޭޝަންހޭހަން" ގެ ދަށުން ސްޕެޝަލިސްޓް ޑޮކްޓަރު އެޕޮއިންޓްމަންޓާއި މެޑިކަލް އިންވެސްޓިގޭޝަންތަކަށް ގައިދީން ހޮސްޕިޓަލްތަކަށް ގެންދިއުމުގައި ހުރިހާ ސީނިއާ އޮފިސަރުން ވެސް އަމަލީ ގޮތުން ހަރަކާތްތެރިވާނެކަމަށެވެ.

އެގޮތުން މި އޮޕަރޭޝަންގެ ސަބަބުން އޯވަޑިއު ރެފަރަލްތަކުގެ ބެކްލޮގް ސާފުވެ، ގައިދީން މިފަދައިން ޑޮކްޓަރަށް ގެންދިއުމުގައި ނިޒާމީ ބަދަލުތައް ހަރުދަނާވެގެންދާނެކަމަށް ކޮމިޝަނާ ވިދާޅުވިއެވެ. ޖުމްލަ 70 އަށްވުރެ ގިނަ އޮފިސަރުން ބައިވެރިވާ މި ޕްރޮގްރާމް ކުރިއަށް ގެންދަނީ ،މާލޭގެ ހޮސްޕިޓަލްތަކާއި ކްލިނިކްތަކާއި މަޝްވަރާ ކޮށްގެން ތިން ހަފްތާގެ މުއްދަތަކަށެވެ.

Advertisement

ކަރެކްޝަންސްގެ އިސްވެރިން ޤައިދީން ޑޮކްޓަރަށް ދެއްކުމުގެ ޙަރަކާތެއް މިއަދު ހިންގިއިރު ފަހަކަށް އައިސް ޤައިދީންނަށް ބޭސްފަރުވާނުލިބުމުގެ ޝަކުވާވަނީ އިތުރުވެފައިވާކަން ފާހަގަކޮށްލެވެއެވެ.