އިންވެސްޓަރުން އެންމެ ބޮޑަށް އިންވެސްޓްކުރަން ބޭނުންވާ ޤައުމަށް ދިވެހިރާއްޖެ ވެއްޖެކަމަށް ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވެއްޖެއެވެ.
މިއަހަރުގެ މޯލްޑިވްސް އެކައުންޓެންޓްސް ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރ ވިދާޅުވީ، އިންވެސްޓްމަންޓަށް މުޅި ދުނިޔޭގައިވެސް ގިނަ ގޮންޖެހުންތަކެއް އެބަހުރި ކަމަށާއި ވަކިން ޚާއްސަކޮށް ފައިނޭންސް ހޯދުމަށް ގިނަ ގޮންޖެހުންތަކާއި ކުރިމަތިވެފައިވާކަމަށް މިނިސްޓަރ ވިދާޅުވިިއެވެ.
މި ރަސްމިއްޔާތުގައި މިނިސްޓަރ ވަނީ ރާއްޖޭގެ ފަތުރުވެރިކަމުގެ ސިނާއަތާ ގުޅިގެންވެސް ވާހަކަދައްކަވާފައެވެ. އެގޮތުން މިނިސްޓަރ ވިދާޅުވީ، ރާއްޖޭގެ ޖީޑީޕީގެ %46 އިންސައްތަ އަކީ ފަތުރުވެރިކަން ކަމަށެވެ.
"އަހަރެމެން ވިސްނަންވީ ޤައުމަށް ފައިދާ ކުރާނެ ފަދަ ގޮތަކަށް. ބައެއް ފަހަރު އެއީ އެންމެ މަޤްބޫލު ކަމަށް ނުވެދާނެ. ބޭނުންވަނީ ރާއްޖޭގެ ވިޔަފާރިތައް ރާއްޖޭގެ ކުންފުނިތަކުން އޮޕަރޭޓްކުރަން. އެހެންނަމަވެސް ރާއްޖެއިން ބޭރުގެ ކުންފުނިތަކުން ރާއްޖެ އައިސް އިންވެސްޓްކުރުމަށް ބާރުއަޅަންޖެހޭ"
ޓޫރިޒަމް މިނިސްޓަރ އަބްދުﷲ މައުސޫމް
މިނިސްޓަރ އިތުރަށް ވިދާޅުވީ، ދެމެހެއްޓެނިވި ގޮތެއްގައި ތިމާވެށި، އިޖްތިމާއީ އަދި ހިންގުމުގެ ދާއިރާގެ ކަންކަން ކުރިއެރުވުމުގައި އެކައުންޓެންޓުން މުހިންމު ދައުރެއް އަދާކުރާކަމަށެވެ. އެގޮތުން އެހެން ސިނާއަތްތަކެކޭ އެއްފަދައިން އެކައުންޓިން ދާއިރާއަށްވެސް އިންސާނީ ވަސީލަތް މިހާރަށްވުރެ ބޮޑަށް ބޭނުންވާކަމަށްވެސް މިނިސްޓަރ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
