ފޯޅަވަހީގެ ސިޔާދަތީ ބާރުތައް ހައްގުވަނީ ދިވެހިރާއްޖެއަށްކަމަށް ރައްޔިތުންގެ މަޖިލީހުގެ ރައީސް އަދި ސަރުކާރު ހިންގާ މައި ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ރައީސް ނަޝީދު މިހެ ވިދާޅުވެފައިވަނީ "ފޯއްޅަވަހި: ރާއްޖޭގެ ފަޅުރަށެއް" ނަމުގައި އާންމު ކުރި ލިޔުމެއްގައެވެ.

އެ ލިޔުމުގައި ނަޝީދު ވިދާޅުވީ ފޯޅަވައްސަކީ ދިވެހިރާއްޖޭގެ ރަށެއްކަން ތާރީހީ އެކި އެކި ލިޔުންތަކުން ފެންނަން އޮތްކަމަށެވެ. އެގޮތުން 1700 ގެ އަހަރުތަކުގައި އެތަނަށް އަޅުން ގެންދެވުނުއިރު، ރާއްޖެއަށް ވެސް އެ ދުވަސްވަރު އަޅުން ގެނެވޭ ކަމަށް ނަޝީދު ވިދާޅުވިއެވެ. 

Advertisement

ނަޝީދުގެ ބަޔާނުގައި ވާގޮތުން ފޯޅަވައްސަށް އަޅުން ގެންދަން ފެށީ 1793 ވަނަ އަހަރުން ފެށިގެންނެވެ. އެދުވަސްވަރު ރާއްޖެއަށްވެސް ވަރަށް ގިނައިން އަޅުން ގެނެސް އުޅުނުކަމަށް އެމަނިކުފާނު ވިދާޅުވިއެވެ. އެގޮތުން ފޯޅަވެއްސާއި މާލެއަށް އަޅުން ގެންނަނީ އެއްތަނަކުން ކަމަށްވާއިރު، އެއް އާއިލާއަކުން ގެނެސްފައިހުރުމަކީ ވަރަށް ގާތްކަމެއް ކަމަށް ނަޝީދު ވިދާޅުވިއެވެ.

ފޯޅަވަހި ކަމަށް ވިދާޅުވެފައިވަނީ ޗާގޯސްގެ އަތޮޅުތަކުގެ ތެރެއިން ހިމެނޭ ޕެރޮސް ބަނޮސް އަތޮޅަށް ކަމަށް ނަޝީދު ވިދާޅުވެފައިވެއެވެ. ފޯޅަވަހީގެ ސިޔާދަތީ ބާރު އިނގިރޭސިން ދޫކޮށްލާއިރު އެރަށުގެ ބާރު އެނބުރޭނީ އެރަށުގެ އަހުލުވެރިންނަށް ކަމަށް ވީނަމަވެސް އެތަނުގައި ބައެއް ނެތް ކަމަށާއި މީހުން ތިބީ ޑިއޭގޯ ގާސިއާ އަތޮޅުގައި ކަން ނަޝީދު ފާހަގަކުރެއްވިއެވެ. އަދި އެމީހުންގެ އެއްބައި މީހުން ތިބީ މޮރިޝަސްގައި ކަމަށާއި އަނެއްބައި މީހުންތިބީ އިނގިރޭސިވިލާތުގައި ކަމަށް ރައީސް ނަޝީދު ވިދާޅުވިއެވެ.

މޮރިޝަސްއަށް ގެންދިޔައީ ފޯޅަވަހީގެ މީހުން ނޫންކަން ފާހަގަކުރައްވައި ރައީސް ނަޝީދުގެ ބަޔާނުގައި ވިދާޅުވެފައިވަނީ، ފޯޅަވަހީގައި ބަޑަހަޖަހައިގެން މަސްވެރިކަމު އުޅުނީ ދިވެހީންކަމަށެވެ.

އެހެންކަމުން އިނގިރޭސި ދައުލަތުން ޗާގޯސް ރިޖްގެ ރައްރަށުން ފައިބާއިރެއްގައި ޑިއޭގޯ ގާސިޔާ އާއި އެހެން ބައެއް އަތޮޅުތައް މޮރިޝަސްގެ ސިޔާދަތީ ބާރުގެ ދަށަށް ފުރޮޅުނު ނަމަވެސް ފޯޅަވަހީގެ ސިޔާދަތީ ބާރުވެރިކަން ލިބުން އެންމެ ހައްގީ ދިވެހީންނަށްކަމަށް ރައީސް ނަޝީދުގެ ބަޔާނުގައި ވިދާޅުވެފައި ވެއެވެ.