ރާއްޖޭގެ ހަކަތައިގެ ދާއިރާގެ މަގުޗާޓު، މުރާޖައާކުރުމުގެ ގޮތުން ކަމާބެހޭ ފަރާތްތަކާއި އެކު މަޝްވަރާ ބައްދަލުވުމެއް މިއަދު ފަށައިފި އެވެ.

 މިކަމަށްޓަކައި ހޮޓެލް ޖެންގައި ޚާއްސަ ރަސްމިއްޔާތެއް ބާއްވާފައިވާއިރު، މި ބައްދަލުވުމުގެ އެންމެ ބޮޑު ބޭނުމަކީ، ހަކަތައިގެ ދާއިރާއިން 2030ގެ ކުރިން ހާސިލްކުރުމަށް ބޭނުންވާ ކަންކަން ކުރުމަށް، އެކުގައި ގުޅިގެން މަސައްކަތް ކުރުން ކަމަށް އެ މިނިސްޓްރީން ވިދާޅުވެއެވެ.

އެ މަގުޗާޓަކީ ސަރުކާރުގެ ސިޔާސަތުތަކާއި ސްޓްރެޓެޖިކް އެކްޝަން ޕްލޭނަށް ބިނާކޮށް، އޭގައިވާ ލަނޑުދަނޑިތައް ހާސިލުވާނެގޮތަށް، ރާއްޖޭގެ ހަކަތައިގެ ދާއިރާއަށް އަމާޒުކޮށްގެން އެކުލަވާލާފައިވާ މަގުޗާޓެއް ކަމަށް އެންވަޔަރަމަންޓް މިނިސްޓްރީން ބުނެއެެވެ.

Advertisement

އެއް ދުވަހުގެ މި ބައްދަލުވުމުގައި ހަކައިގެ ދާއިރާއާއި ގުޅުންހުރި 70 ސްޓޭކްހޯލްޑަރުން ބައިވެރިވެފައިވެއެވެ. ބައްދަލުވުން ފައްޓަވައިދެއްވީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރ ޚަދީޖާ ނަސީމްއެވެ.

އޭޝިއަން ޑިވެލޮޕްމަންޓް ބޭންކް (އޭޑީބީ) އަދި އިންޓަނޭޝަނަލް ސޯލާ އެލަޔަންސް (އައިއެސްއޭ) ގެ ފަންނީ އެހީތެރިކަމާއެކު ކުރިއަށްގެންދާ އެ ވޯކްޝޮޕަކީ ރާއްޖޭގެ ހަކަތައިގެ ރޯޑްމެޕް މުރާޖައާކުރުމާ ގުޅޭގޮތުން ކުރިއަށް ގެންގޮސްފައިވާ މަޝްވަރާތަކުން ފާހަގަ ކުރެވިފައިވާ ކަންކަން ހުށަހަޅައިދީ އެކަންކަމާއި ގުޅިގެން އިތުރަށް ޚިޔާލުހޯދުމަށް ބާއްވާ ވާރކްޝޮޕެއްކަމަށްވެސް އެންވަޔަރަމެންޓް މިނިސްޓްރީން ބުނެއެވެ.