އަބްދުﷲ ރަޝީދުގެ ޕޯސްޓްމޯޓަމް ހެދުމަށް ހުރަހެއް ނެތް: ސިވިލް ކޯޓު

ސިވިލް ކޯޓު

ފުލުހުންގެ ބެލުމުގެ ދަށުގައި ހުއްޓައި ހާޓު އެޓޭކެއް ޖެހިގެން ނިޔާވި ގދ.ހޯޑެއްދޫ، ރަޝީދުގެ ހަށިގަނޑުގެ ޕޯސްޓުމޯޓަމް ހެދުން ހުއްޓުވުމަށް ކޯޓު އަމުރެއް ނެރެދޭންޖެހޭ ތަނެއް ނެތް ކަމަށް ސިވިލް ކޯޓުން ހުކުމްކޮށްފިއެވެ.

އަންގާރަ ދުވަހު ގދ. ހޯނޑެއްދޫ ގައި ހިންގި އޮޕަރޭޝަނެއްގެ ދަށުން ރަޝީދު ފުލުހުންގެ ބެލުމުގެ ދަށަށް ގެނެސްފައިވަނިކޮށް އޭނާ ނިޔާވީ މެޔަށް ތަދެއް އަރައިގެން، އެ ވޭނުގައި ފަރުވާ ނުދެވި އެވެ. އެ މައްސަލާގައި ސިއްހީ ފަރުވާ އަށް އެދި ރަޝީދު އާދޭސް ކުރި އިރުވެސް ފުލުހުން ބުނެފައިވަނީ އޭނާ އެކްޓް ޖައްސަނީ ކަމަށް، އާއިލާއިން މައުލޫމާތު ދެއެވެ. 

އަދި އެފަދަ ގޮތަކަށް އުޅެއުޅެ އޮއްވާ އޭނާ ނިޔާވެފައިވާއިރު، ފުލުހުން ވަނީ އޭނާގެ އާއިލާގެ ނުރުހުމުގައި އޭނާގެ އެޓޮޕްސީ ހަދަން މާލެ ގެނެސް ގަލޮޅު މޮޗަރީއަށް ހަށިގަނޑު ލާފައެވެ. ވުމާއެކު އޭނާގެ އާއިލާގެ ފަރާތުން، ވަނީ ރަޝީދުގެ އެޓޮޕްސީ ހެދުމަށް ނިންމާފައިވާ ނިންމުން ބާތިލް ކޮށް، އޭނާގެ ހަށިގަނޑު ޢާއިލާ އާއި ހަވާލުކުރުމަށް އެދި ކޯޓު އަމުރެއް ހޯދުމަށް ސިވިލް ކޯޓަށް މައްސަލަ ހުށަހަޅާފައެވެ. 

އެ މައްސަލައިގައި ކުރިއަށް ގެންދިޔަ އަޑުއުހުމުގައި ފުލުހުން ބުނީ ފުލުހުންގެ މައްޗަށް ބޮޑެތި ތުހުމަތުތަކެއް ކުރެވުމާއި ގުޅިގެން އަދި ފުލުހުން ބަދުނާމުވާ ގޮތަށް ގިނަ ވާހަކަތަކެއް ފެތުރުމާއި ގުޅިގެން ތަހުގީގުގެ ބޭނުމަށް ޕޯސްޓްމޯޓަމް ހަދަން ޖެހޭކަމަށެވެ. އަދި އެއީ ގާނޫނުން ފުލުހުންގެ މައްޗަށް ލިބިދޭ ބާރެއްކަމަށް ދައުލަތުން ވަނީ ބުނެފައެވެ. 

އެހެން ނަމަވެސް އާއިލާއިން ބުނީ އެ މަރަކީ އާދަޔާ ޚިލާފު މަރެއް ނޫން ކަމަށާއި ޕޯސްޓްމޯޓަމް ހަދައިގެން ނިކުންނާނެ އިތުރު ނަތީޖާއެއް ނޯންނާނެކަމަށެވެ. އެހެންކަމުން ހަށިގަނޑަށް އިތުރު އަނިޔާ ނުދީ އާއިލާއިން އެދެނީ ރަޝީދުގެ ޖަނާޒާ ވީހާވެސް އަވަހަކަށް ބޭއްވުމަށެވެ. 

އެ މައްސަލާގައި ސިވިލް ކޯޓުން މިއަދު ކުރި ހުކުމްގައި ގާޟީ ހަސަން ފަހީމް އިބްރާހީމް ވިދާޅުވީ، މި މައްސަލާގައި ރަޝީދުގެ ޢާއިލާއިން އެދީފައިވާ ގޮތުގެ މަތިން ކޯޓު އަމުރު ނެރެދެންޖެހޭ ތަނެއް ނެތް ކަމަށެވެ. 

Advertisement

ކޮމެންޓް