އައިޖީއެމްއެޗްގައި މަސައްކަތް ކުރި ފިލިޕިންސް ނަރުސް، މޭރީ ގްރޭސް ދަން ޖެހުނީ ކަމަށްބުނެ ހޮސްޕިޓަލަށް ގެންދިޔަ ހިސާބުން ފެށިގެން ދެވުނު ފަރުވާ އާއި ބޭސްތަކުގެ މެޑިކަލް ޗާޓުތައް ނުލިބޭތީ އެ ހޮސްޕިޓަލުގެ ނަރުހުންގެ ހެކިބަސް ނެގުން ފަސްކޮށްފިއެވެ.
މޭރީގެ މަރުގެ މައްސަލައިގައި މާވިން އެސްވައި ވާގަސްގެ މައްޗަށް ދައުވާ ކުރަނީ އެނގި ހުރެ މީހަކު މެރުމުގެ ކުށުގެ ދައުވާއެވެ. އަދި މާވިންގެ ލޯބިވެރިއެއް ކަމަށްވާ، އައިޖީއެމްއެޗްގެ ނަރުހެއްގެ ގޮތުގައި މަސައްކަތް ކުރަމުން އައި ހަލީމަތު ލަމްހާއަށް ކުރާ ދައުވާތަކަކީ، އެނގި ހުރެ މީހަކު މެރުމުގައި ބައިވެރިވުމާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމާއި އަދި، ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާއެވެ.
މި މައްސަލާގައި މިހާރު ކުރިއަށް ދަނީ ހެކިބަސް ނެގުމުގެ މަރުހަލާއެވެ. އެގޮތުން ކްރިމިނަލް ކޯޓުގައި މިއަދު އޮތް އަޑުއެހުމުގައި ލަމްހާގެ ފަރާތުން ވަނީ އައިޖީއެމްއެޗްގައި ކޮންމެ ޕޭޝަންޓަކަށް ތައްޔާރު ކުރާ މެޑިކަލް ޗާޓުތަކެއް އޮންނައިރު، މޭރީ ގްރޭސްގެ އެ ޗާޓު ހޯދުމަށް އެދިފައިވާތީ، އެ ނުލިބެނީސް ހެކިބަސް ނެގުމަށް އިއުތިރާޒުކޮށްފައެވެ.
މެޑިކަލް ޗާޓުތައް ހޯދުމަށް ލަމްހާގެ ފަރާތުން އެދިފައި ވަނީ ޝަރީއަތުގެ ކުރިން ހުށަހަޅާ ހުށަހެޅުންތަކުގަ އެވެ. އެތަކެތި ލަމްހާއަށް ފޯރު ކޮށްދިނުމަށް ގާޒީ ވަނީ ނިންމަވާފަ އެވެ. އެހެންކަމުން ލަމްހާގެ ފަރާތުން އެދިފައި ވަނީ އެ ޗާޓުތައް ނުލިބޭހާ ހިނދަކުން ނަރުހުންގެ ހެކިބަސް ނުނެގުމަށެވެ. ދައުލަތުން ބުނެފައި ވަނީ ހޮސްޕިޓަލަށް ގުޅައިގެން އެކަން ކަށަވަރު ކުރާނެ ކަމަށެވެ.
އަދި މިހާރު ފޯރުކޮށްދީފައި އެވަނީ ހޮސްޕިޓަލުން ދައުލަތަށްވެސް ދިން ލިޔުންތައް ކަމަށާ މެޑިކަލް ޗާޓުތައް ހޯދުމަށް އަމުރެއް އޮތުމުން އެކަން ސާފުނުކޮށް ހެކިބަސް ނެގުން ކުރިޔަށް ނުގެންދެވޭނެ ކަމަށް ޝަރީއަތުން ވަނީ ނިންމާފައެވެ.
ނަރުހުންގެ ހެކިބަސް ނެގުމަށް މާދަމައަށް އަޑުއެހުމެއް އޮތީ ތާވަލުކޮށްފައެވެ.
މި މައްސަލައިގައި މިއަދު އެންމެ ފުރަތަމަ ހެކިބަސް ދިނީ މާވިން އަދި މޭރީ ދިރިއުޅޭ ގޭގެ އެހެން އެޕާޓްމެންޓެއްގައި އުޅުނު މީހެކެވެ. އޭނާ ބުނެފައި ވަނީ މޭރީ މަރުވި އޮކްޓޯބަރު 19، 2021 ދުވަހު އެގޭ ސިޑިމަތިން ވަކި މީހަކު ފެނުނުކަން ހަނދާން ނެތް ކަމަށެވެ. އެކަމަކު އެކި ދުވަސް މަތިން މާވިންއާ ދިމާވާ ކަމަށް އޭނާ ބުނެފައިވެ އެވެ.
މިއަދު ކޯޓުގައި ހަތަރު މީހެއްގެ ހެކިބަސް ނަގަން ތާވަލުކުރި ނަމަވެސް، ހާޒިރުވީ އެންމެ މީހެކެވެ. އެކަކު ކޯޓަށް އަންނަނިކޮށް އެކްސިޑެންޓެއް ވީކަމަށް ޝަރީއަތުން ބުނެފައިވެ އެވެ. އަނެއް ދެ މީހުން ހާޒިރު ނުވި ސަބަބު ސާފެއް ނުވެ އެވެ.
Advertisement
This content is created and paid for by advertisers and does not involve Voice Journalists
