ތާރީޚީ ގޮތުން ބަލާއިރު މަލިކާއި ދިވެހިރާއްޖެއާއި އޮތް ގުޅުން މާ ބޮޑު ކަމަށާ، ވުމާއެކު އިންޑިއާ އާއި ވާހަކަ ދައްކައިގެން މަލިކު ހޯދަން އުޅުން މާ މުހިންމު ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވެއްޖެެއެވެ. 

ފޯޅަވަހީގެ މައްސަލަ ހޫނުވެފައިވާ މި ދަނޑިވަޅުގައި ނިހާދު މިއަދުގެ ކުރެއްވި ޓުވީޓެއްގައި ވިދާޅުވީ، ރާއްޖެ އާއި ތާރީޚީ ގޮތުން ބޮޑު ގުޅުމެއް އޮތް ތަނެއް ކަމުގައިވާ މަލިކުގައި ތިބީ ދިވެހި ބަހުން ވާހަކަދައްކާ މީހުން ކަމަށެވެ. އަދި މަލިކު ޢާއިލާ ތަކާއި ގުޅުން ހުރި އާއިލާތައްވެސް ދިވެހިރާއްޖޭގައި ތިބި ކަމަށް އޭނާ ވިދާޅުވިއެވެ. 

ވުމާއެކު އިންޑިއާ އާއި ވާހަކަ ދައްކައިގެން މަލިކު ހޯދަން ދާންވީ ނޫންތޯ އޭނާ ވަނީ ސުވާލު ކުރައްވާފައެވެ. 

"އެ ކަނޑަކީ ދިވެހި މަސްވެރިންނަށް މުހިންމު ކަނޑެއް. ކުރީގެ ރާއްޖޭގެ ރަށެއް. އަސްލު މާ މުހިންމު ދޯ؟" ނިހާދު ވިދާޅުވިއެވެ. 

ޗާގޯސް އާއި ރާއްޖޭގެ އިން ވަކިކުރުމުގެ މައްސަލައިގައި 2019 ވަނަ އަހަރު މި ސަރުކާރުން ވޯޓް ދިނީ މޮރިޝަސްއާ ދެކޮޅަށް އިނގިރޭސިވިލާތާއި އެއްކޮޅަށެވެ. އެހެން ނަމަވެސް، ޗާގޯސް ރަށްތަކުގެ ސިޔާދަތީ ބާރުވެރިކަން މޮރިޝަސްއަށް އޮތް ކަމަށް އެއްބަސްވެ މިދިޔަ އޮގަސްޓު މަހު ރައީސް ސޯލިހް މޮރިޝަސްގެ ރައީސްއަށް ސިޓީއެއް ވަނީ ފޮނުވާފައެވެ. އަދި ސަރުކާރުން އެކަން ހާމަކުރީ އިން ވަކިކުރުމުގެ މައްސަލައިގެ ޝަރީއަތުގައި މީގެ ދެހަފްތާއެއްހާ ކުރިންނެވެ.

ސަރުކާރުގެ މި ކުއްލި ނިންމުމާއި ގުޅިގެން ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ. އެގޮތުން އިދިކޮޅުން އެކަމާއި ކަންބޮޑުވުން ފާޅުކޮށް ސުލްހަވެރި އިހްތިޖާޖެއް ވެސް ރޭ ވަނީ ކުރިއަށް ގެންގޮސްފައެވެ.