ޗާގޯސްއަކީ ރާއްޖޭގެ ބައެއް ކަމުގެ ހެކި ދެއްކުމުން އެެންމެން އެ ވާހަކަ ދައްކަންވީ ކަަމަށް ވިދާޅުވެ ޗާގޯސް މައްސަލާގައި، ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އިދިކޮޅު ކޯލިޝަނަށް ބަހުގެ ހަމަލާތަކެއް ރައްދު ކުރައްވައިފިއެވެ. 

ޗާގޯސް މައްސަލައާ ގުޅޭގޮތުން އިމްރާން މިއަދު ކުރެއްވި ޓްވީޓެއްގައި ވިދާޅުވީ އެއީ ރާއްޖޭގެ ބައެއް ކަމުގައި ދެކޭނަމަ އެ ވާހަކަ ދުނިޔެއަށް އަޑު އިވޭ ވަރަށް ދައްކަން އެންމެ އެކަށޭނަ ފުރުސަތު ލިބުނީ ކުރީގެ ރައީސް ޔާމީން އަބްދުލްގައްޔޫމްގެ ސަރުކާރަށް، 2016 އަދި 2017 ވަނަ އަހަރު ކަމަށެވެ. 

އަދި މިއަދުވެސް އެ ވާހަކަ ދައްކަވާ ބޭފުޅުން ފުރިހަމަ ހެކި ގެންނެވުމުން އެންމެވެސް އެ ވާހަކަ ދައްކަންވީ ކަމަށް އިމްރާން ވިދާޅުވިއެވެ.

ރާއްޖެ އާއި ޗާގޯސް އައިލެންޑްސްއާ ދެމެދު ފުށުއަރާ ކަނޑުގެ ސަރަހައްދު ބެހުމުގައި މިހާރު އުފެދިފައިވާ މައްސަލައާ ގުޅޭ ކަންބޮޑުވުން ސިޔާސީ ޕާޓީތަކާއި ގާނޫނީ ވަކީލުން ގެންދަވަނީ ފާޅު ކުރައްވަމުންނެވެ.

އެގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ފޯޅަވަހީގެ ސިޔާދަތީ ބާރުތައް ހައްގުވަނީ ދިވެހިރާއްޖެއަށް ކަމަށް ވިދާޅުވެފައެވެ. 

"ފޯއްޅަވަހި: ރާއްޖޭގެ ފަޅުރަށެއް" ނަމުގައި އެމަނިކުފާނު އާންމު ކުރި ލިޔުމެއްގައި ވިދާޅުވީ ފޯޅަވައްސަކީ ދިވެހިރާއްޖޭގެ ރަށެއްކަން ތާރީހީ އެކި އެކި ލިޔުންތަކުން ފެންނަން އޮތްކަމަށެވެ. އެގޮތުން 1700 ގެ އަހަރުތަކުގައި އެތަނަށް އަޅުން ގެންދެވުނުއިރު، ރާއްޖެއަށް ވެސް އެ ދުވަސްވަރު އަޅުން ގެނެވޭ ކަމަށް ނަޝީދު ވިދާޅުވިއެވެ. 

ނަޝީދުގެ ބަޔާނުގައި ވާގޮތުން ފޯޅަވައްސަށް އަޅުން ގެންދަން ފެށީ 1793 ވަނަ އަހަރުން ފެށިގެންނެވެ. އެދުވަސްވަރު ރާއްޖެއަށްވެސް ވަރަށް ގިނައިން އަޅުން ގެނެސް އުޅުނުކަމަށް އެމަނިކުފާނު ވިދާޅުވިއެވެ. އެގޮތުން ފޯޅަވެއްސާއި މާލެއަށް އަޅުން ގެންނަނީ އެއްތަނަކުން ކަމަށްވާއިރު، އެއް އާއިލާއަކުން ގެނެސްފައިހުރުމަކީ ވަރަށް ގާތްކަމެއް ކަމަށް ނަޝީދު ވިދާޅުވިއެވެ.

އަދި މޮރިޝަސްއަށް ގެންދިޔައީ ފޯޅަވަހީގެ މީހުން ނޫންކަން ފާހަގަކުރައްވައި ރައީސް ނަޝީދުގެ ބަޔާނުގައި ވިދާޅުވެފައިވަނީ، ފޯޅަވަހީގައި ބަޑަހަޖަހައިގެން މަސްވެރިކަމު އުޅުނީ ދިވެހީންކަމަށެވެ.