މިދިޔަ އަހަރު ތެރޭގައި ގއ މާމެންދޫގައި ހިންގި ގުރޫޕް މާރާމާރީއެއްގައި އަހުމަދު އުދެއްޔު މަރާލުމުގައި ބައިވެރިވި ކުޑަ ކުއްޖާ 25 އަހަރު ދުވަހަށް ޖަލަށް ލުމަށް ޖުވެނައިލް ކޯޓުން ހުކުމްކޮށްފިއެވެ. 

25 އަހަރުގެ ޖަލު ހުކުމުގެ އިތުރުން އުދެއްޔުގެ މަރުގެ ދިޔައިގެ ގޮތުގައި އެއް މިލިއަން ރުިފޔާ ދިނުމަށްވެސް ޖުވެނައިލް ކޯޓުން ވަނީ ހުކުމްކޮށްފައެވެ. 

އުދެއްޔު މަރާލިކަމުގެ ތުހުމަތުގައި ދައުލަތުން ވަނީ 17 އަހަރުގެ ކުއްޖެއްގެ މައްޗަށް ދައުވާ އުފުލާފައެވެ. އޭނާގެ މައްޗަށް ދައުލަތުން ދެ ދައުވާއެއް އުފުލާފައިވެއެވެ. 

ޖުވެނައިލް ކޯޓުން އެ މައްސަލާގައި އިއްޔެ ހުކުމްކުރީ ގަސްދުގައި މީހަކު މަރާލުމުގެ ކުށުގައި 18 އަހަރާއި 9 މަހަށް ޖަލަށްލުމަށާއި އެއް މިލިއަން ރުފިޔާގެ މަރުގެ ދިޔައެއް އެއް އަހަރުގެ ތެރޭގައި ދެއްކުމަށެވެ. އަދި ކައްފާރާގެ ގޮތުން ދެ މަސް ދުވަހު ރޯދަ ހިފަން ހުކުމްކުރި އެވެ.

ތޫނު އެއްޗަކުން ހަމަލާދިން މައްސަލާގައި ހުކުމްކުރީ ހަ އަހަރާއި އަށް މަހަށް ޖަލަށްލުމަށެވެ. އޭނާއަށް މިހާރު 18 އަހަރު ފުރިފައި ވިޔަސް، އޭނާ ބަންދުކުރަން ޖެހެނީ ކުޑަކުދިން ބަންދުކުރާ މަރުކަޒެއްގަ އެވެ.

އުދައްޔުގެ މަރާ ގުޅިގެން އިތުރު ތިން މީހަކަށް ކްރިމިނަލް ކޯޓުގައި ދައުވާކުރެ އެވެ. 

އެ ދައުވާތައް މިހާރުވެސް ކޯޓުގައި ހިނގަމުންދާކަން ފާހަގަކޮށްލެވެއެވެ.