ލޯބީގެ މައްސަލައެއްގައި މަރާލި މޭރީ ގްރޭސްގެ މަރުގެ މައްސަލައިގައި އޭނާގެ މެޑިކަލް ޗާޓު ނެތްކަމަށް ދައުލަތުން ބުނި ބުނުން އެ މައްސަލައިގައި ދައުވާ ލިބޭ ހަލީމަތު ލަމްހާ ދޮގުކޮށްފިއެވެ. 

މޭރީ މަރާލިކަމުގެ ތުހުމަތުގައި ލަމްހާގެ އިތުރުން މޭރީގެ ފިރިމީހާ މާވިންގެ މައްޗަށް ދައުލަތުން ވަނީ ދައުވާ އުފުލާފައެވެ. އެދެމީހުންގެ މައްޗަށް ދައުލަތުން ކުރަނީ ދެ މީހުން ބައިވެރިވެގެން މޭރީ މަރާލިކަމުގެ ކުށުގެ ދައުވާއެވެ. 

އެ މައްސަލާގައި ކޯޓުން އޮތީ މޭރީއަށް ފަރުވާ ދިން މެޑިކަލް ޗާޓުތައް ފޮނުވަން ދައުލަތުގެ މައްޗަށް އަމުރެއް ނެރެފަ އެވެ.

އެކަމާއި ގުޅޭގޮތުން ދައުލަތުން ކްރިމިނަލް ކޯޓުގައި ބުނީ މަރުވެގެން ހޮސްޕިޓަލަށް ގެންނަ މީހުންގެ މެޑިކަލް ޗާޓެއް ނަހަދާނެ ކަމަށް އައިޖީއެމްއެޗުން ބުނެފައިވާކަމަށާއި، އެކަން އިތުރަށް ބަލަމުންދާކަމަށެވެ. 

ލަމްހާ ވަނީ އެކަން ދޮގުކޮށްފައެވެ. އޭނާ އަކީ އައިޖީއެމްއެހުގައި މަސައްކަތް ކުރަމުންދިޔަ ނަރުހެކެވެ. 

އޭނާ ބުނީ އެ ހުރިހާ ލިޔުންތަކެއް ހުންނާނެ ކަމަށާއި އަދި ދައުލަތުން ހަދަނީ "ކަނޑައެޅިގެން ބޮޑު ދޮގެއް" ކަމަށެވެ. ލަމްހާގެ އެ ވާހަކަތަކަށް އެ މައްސަލައިގައި ދައުވާ ލިބޭ މާވިންވެސް ވަނީ އެއްބަސްވެފައެވެ. 

އެ އާއެކު އެ މައްސަލަ ބައްލަވާ ގާޒީ  ހުސައިން ފާއިޒް ރަޝާދު ވަނީ ދައުލަތުން އެފަދަ މައްސަލަތައް ފަރުވާތެރިކަމާއެކު ބެލުމަށް އަންގާފައެވެ. 

އެ މައްސަލައާއި ގުޅިގެން މިހާރު ކުރިއަށް ދަނީ ހެކިން ހެކިބަސް ނެގުމުގެ މަރުހަލާއެވެ. އެގޮތުން މިއަދު ކޯޓުގައި ހަތަރު މީހުންގެ ހެކިބަސް ވަނީ ނަގާފައެވެ. 

އެގޮތުން މޭރީއާއި މާވިން އުޅެމުންދިޔަ ގޭގެ އެހެން ފްލޯއެއްގައި އުޅުނު ބައެއްގެ ހެކިބަސް ވަނީ ނަގާފައެވެ. އެ މީހުންގެ ހެކިބަސް ނެގީ އެ ހާދިސާ ހިނގި ދުވަހު އެގޭ ސިޑިން މަތިން މީހަކު ނުފެންނަ ކަން ސާބިތު ކުރުމަށެވެ